ادىلەت مينيسترلىگى 700 گە تارتا قىزمەتكەردى قىسقارتىپ، 2 ميلليارد تەڭگە ۇنەمدەدى

نۇر- سۇلتان. قازاقپارات - ادىلەت مينيسترلىگى كادىر قىزمەتىنىڭ باسشىسى قاسىمقوجا ءومىروۆتىڭ ايتۋىنشا، ۇنەمدەلگەن 2 ميلليارد تەڭگە قالعان قىزمەتكەرلەردىڭ جالاقىسىن ارتتىرۋعا جۇمسالىپ جاتىر، دەپ حابارلايدى قازاقپارات ءتىلشىسى.

«وسى جىلدىڭ اقپانىنان باستاپ ادىلەت مينيسترلىگىنىڭ اۋماقتىق دەاپرتامەنتتەرىنىڭ ءبارى دە فاكتورلى- بالدى شكالا جۇيەسىنە ءوتتى. كەلەسى جىلدان باستاپ جاڭا ادىستەمەگە سايكەس مەملەكەتتىك قىزمەتشىلەردىڭ بۇكىل جۇمىس ءوتىلى ەسەپتەلەدى - بۇل ولاردىڭ ايلىعىن كەزەكتى رەت كوتەرەدى. قازىرگى ۋاقىتتا ءبىز مەملەكەتتىك قىزمەتشىلەردى، سونداي- اق ۆەدومستۆوىشىلىك ۇيىمداردىڭ قىزمەتكەرلەرىن وڭتايلاندىرۋ جۇمىستارىن جۇرگىزۋدەمىز. وسىنىڭ ارقاسىندا قاراجات ۇنەمدەلەدى. فاكتورلى- بالدى شكالاعا ءوتۋ - وڭ تاجىريبە كورسەتتى»، - دەدى قاسىمقوجا ءومىروۆ ادىلەت مينيسترلىگىنىڭ ونلاين رەجيمدە وتكەن القا ماجىلىسىندە.

ونىڭ ايتۋىنشا مەملەكەتتىك قىزمەتشىلەردىڭ ورنىنا لەگەن باسەكە دە قىزا تۇسكەن. بۇرىن ءبىر ورىنننان بەس ادام ۇمىتتەنسە، قازىر ءبىر ۆاكانتتى ورىننان ۇمىتكەرلەردىڭ سانى 13 ادامعا دەيىن جەتكەن.

«ۆەدومستۆوىشىلىك ۇيىمدارداعى قىزمەتكەرلەردىڭ سانىن بيىل 10، كەلەسى جىلى 15 پايىزعا قىسقارتامىز. وتكەن جىلدان بەرى مەمقىزمەتشىلەردى وڭتايلاندىرۋ جۇمىسىن جۇرگىزىپ، ول شارۋانى وسى جىلدىڭ العاشقى توقسانىندا اياقتادىق. بۇل جۇمىس ادىلەت مينيسترلىگىنىڭ بارلىق اۋماقتىق دەپارتامەنتتەرىن فاكتورلى- بالدى شكالاعا وتكىزۋگە جول اشتى. ءبىز 700-گە تارتا قىزمەتكەردى، شامامەن بارلىق قىزمەتكەرلەردىڭ 30 پايىزىن قىسقارتتىق. 200-گە تارتا باسشىلىق لاۋازىمى جويىلدى. 30 مىڭ شارشى مەتر كەڭسە ورىنى، 109 كولىك بوسادى. قىسقارتىلعان قىزمەتكەرلەردىڭ ىشىندە باسشىلىقتا بولعاندار دا بار. ورتا جانە تومەنگى ساناتتاعى قىزمەتكەرلەردىڭ ايلىعى 2-2,5 ەسە ءوستى. وسىلايشا 2 ميلليارد تەڭگە ۇنەمدەلدى. ول قاراجات قالعان قىزمەتكەرلەردىڭ ايلىعىن ارتتىرۋعا جۇمسالىپ وتىر»، - دەدى ول.

اۆتور: ايان بەكەن ۇلى