كوروناۆيرۋس: قىزىلوردا وبلىسىندا ءدارىحانالارعا 7,9 ميلليون تەڭگە ايىپپۇل سالىندى

قىزىلوردا. قازاقپارات - قىزىلوردا وبلىسىندا ءدارى-دارمەك قورى جەتكىلىكتى. بۇل ماقساتتا تاعى 56 ميلليون تەڭگەگە دارىلىك پرەپاراتتار قوسىمشا جەتكىزىلەدى، دەپ حابارلايدى قازاقپارات ءتىلشىسى.

پاندەميا كەزەڭىندە وبلىستا 5 ميلليون قاپتاما كولەمىندە مەديتسينالىق پرەپاراتتار ساتىپ الىندى. ولاردىڭ قاتارىندا ىستىق تۇسىرەتىن دارىلەر، انتيبيوتيكتەر، ۆيرۋسقا قارسى پرەپاراتتار، يممۋنوستيمۋلياتورلار، مەديتسينالىق بۇيىمدار، ينەكتسيالىق پرەپاراتتار بار.

الداعى ۋاقىتتا 56 ميلليون تەڭگەگە تاعى دا ءدارى-دارمەك الىنادى. وبلىستىق مەديتسينالىق جانە فارماتسيەۆتيكالىق باقىلاۋ دەپارتامەنتى وڭىرلەردەگى كوتەرمە ديستريبيۋتورلار مەن ءدارىحانالاردا سۇرانىسقا يە دارىلىك زاتتار مەن مەديتسينالىق بۇيىمداردىڭ تولىق قامتىلۋىنا تۇراقتى مونيتورينگ جۇرگىزۋدە.

بيىلعى جىلدىڭ 15- شىلدەسى مەن 9- جەلتوقسانى ارالىعىندا كوتەرمە ساۋدا قويمالارى مەن ءدارىحانالاردا دارىلىك زاتتار قورى كوبەيدى.

اتاپ ايتقاندا، انتيبيوتيكتەر - 2,2، ۆيرۋسقا قارسى پرەپاراتتار - 2,3، انتيكواگۋليانتتار - 2,4، ىستىقتى تۇسىرەتىن پرەپاراتتار - 3,7، مەديتسينالىق ماسكالار - 1,5 ەسەگە ارتتى.

«مونيتورينگ ناتيجەسىندە 159 دان استام ءدارىحانا قامتىلىپ، شەكتى باعادان اسىرىلىپ ساتىلعان دارىلىك زاتتاردىڭ 72 اتاۋى انىقتالدى. كورسەتىلگەن كەزەڭدە ولارعا 5,2 ميلليون تەڭگە ايىپپۇل سالىندى. شەكتى باعادان اسىپ كەتۋدىڭ 33، دارىلىك زاتتاردى زاڭسىز وتكىزۋدىڭ 17 دەرەگى انىقتالدى. اكىمشىلىك قۇقىق بۇزۋشىلىق تۋرالى 91 حاتتاما تولتىرىلىپ، 7,9 ميلليون تەڭگە ايىپپۇل سالىندى. زاڭسىز اينالىمنان 448 اتاۋداعى دارىلىك زات پەن 36 اتاۋداعى مەديتسينالىق بۇيىم الىندى»، - دەدى وبلىستىق مەديتسينالىق جانە فارماتسيەۆتيكالىق باقىلاۋ دەپارتامەنتىنىڭ ءبولىم باسشىسى نۇربەك ءادىلحانوۆ.

وڭىردە 10 فارماتسيەۆتيكالىق ۇيىم نەسيە الدى. ولاردىڭ 5 ەۋى اۋداندا بولسا، 5 ەۋى قالادا ورنالاسقان. سونىمەن قاتار، كرەديتتەۋگە 13 فارماتسيەۆتيكالىق ۇيىم قۇجاتىن جيناقتاۋدا.

ەستەرىڭىزگە سالا كەتەلىك، 11- جەلتوقساننان باستاپ قىزىلوردا وبلىسىندا كارانتين تالاپتارى جەڭىلدەتىلەدى.