كۇرەستەن الەم چەمپيوناتىنىڭ قورىتىندىسى: قازاقستان 7 مەدال، 8 جولداما الدى
ناقتىراق ايتساق، 14-22- قىركۇيەك ارالىعىندا قازاقستان استاناسىندا گرەك-ريم، ەركىن جانە ايەلدەر كۇرەسىنەن توكيو وليمپياداسىنا جولداما بەرەتىن الەم چەمپيوناتى ءوتتى. بايراقتى باسەكەدە الەمنىڭ 100 ەلىنەن 1002 بالۋان كۇش سىنادى. ءار كۇرەس تۇرىنەن 10 سالماقتان جالپى 30 مەدال جيىنتىعى ساراپقا سالىندى. سونداي-اق، كەلەسى جىلى الاۋى تۇتاناتىن توكيو وليمپياداسىنا ءار سالماقتان 6 بالۋانعا جولداما ۇلەستىرىلدى.
جالپى، كۇرەس تۇرلەرىنەن قازاقستاندىق بالۋاندار 7 مەدال (گرەك-ريم كۇرەسىنەن - 1 كۇمىس، 2 قولا، ايەلدەر كۇرەسىنەن - 1 قولا، ەركىن كۇرەستەن - 2 كۇمىس، 1 قولا) جەڭىپ السا، وليمپيادا ويىندارىنا جالپى 8 جولداماعا يەلىك ەتتى.
الەم بىرىنشىلىگىن العاش بولىپ گرەك-ريم كۇرەسىنىڭ شەبەرلەرى باستاعان بولاتىن. قازاقستاندىق گرەك-ريم كۇرەسىنىڭ بالۋاندارى الەمدىك دودانى ءبىر كۇمىس جانە ەكى قولا مەدالمەن اياقتادى.
اتاپ ايتار بولساق، قورلان جاقانشا (55 كەلى) مەن المات كەبىسپايەۆتىڭ (63 كەلى) جەڭىستى جولىن مەيرامبەك ايناعۇلوۆ جالعاستىردى. 60 كەلىدە بەلدەسكەن ايناعۇلوۆ كىشى فينالدا ۋكراينالىق لەنۋر تەميروۆتى 10:0 ەسەبىمەن جەڭىپ، ءوزىنىڭ جۇلدە قورجىنىن الەم بىرىنشىلىگىنىڭ قولا جۇلدەسىمەن تولىقتىردى.
سونىمەن باقتيار بايسەيىتوۆ باپتايتىن گرەك-ريم كۇرەسىنەن قازاقستان كومانداسى ءوز ەلىمىزدەگى دودانى التىنسىز اياقتادى. چەمپيونات باستالعانعا دەيىن كۇرەس ماماندارى مەن بالۋاندار ەلىمىزدە وتەتىن الەمدىك سىندا ءانۇرانىمىزدى شىرقاتامىز دەگەن ويلارى ىسكە اسپاي قالدى. وسىلايشا، «كلاسسيكتەر» الەم چەمپيوناتىنان ءبىر كۇمىس، ەكى قولا جانە وليمپيادانىڭ ەكى جولداماسىمەن قورىتىندىلادى.
«كلاسسيكتەردەن» كەيىن ايەلدەر كۇرەسىنە دە كەزەك كەلدى. الايدا، بالۋان قىزدارىمىز الەم بىرىنشىلىگىن جالعىز قولا مەدالمەن اياقتادى. 50 كەلى سالماقتا ەل نامىسىن قورعاعان ۆالەنتينا يسلاموۆا الەم چەمپيوناتىندا ەل قورجىنىنا جالعىز قولا مەدال سالدى. سونداي-اق، توكيو وليمپياداسىنا جولداما جەڭىپ الدى. قىزدار كۇرەسىنەن جالپى وليمپياداعا ەكى جولداما بۇيىردى. ەكىنشى جولدامانى بىرىنشىلىكتە 5-ورىنعا يە بولاعان 76 كەلى سالماقتاعى بالۋانىمىز ەلميرا سىزدىقوۆا دا جەڭىپ الدى.
جالپى، نۇر-سۇلتاندا وتكەن الەم بىرىنشىلىگىندە ايەلدەر كۇرەسىنەن العاشقى ۇشتىكتى جاپونيا، رەسەي، ا ق ش قۇرامالارى تۇيىندەدى.
ال الەم بىرىنشىگىندە سوڭعى بولىپ، ەركىن كۇرەس شەبەرلەرى بەلدەستى. الەم چەمپيوناتىنىڭ قورىتىندىسى بويىنشا ەركىن كۇرەستەن قازاقستان قۇراماسى كوماندالىق ەسەپتە تۇڭعىش رەت جۇلدەلى ەكىنشى ورىنمەن اياقتادى. رەسەي قۇراماسى نۇر-سۇلتانداعى الەم بىرىنشىلىگىندە 190 ۇپايمەن جالپى ەسەپتە كوش باستاسا، 103 ۇپايمەن قازاقستان قۇراماسى ەكىنشى ورىننان كورىندى. ۇزدىك ۇشتىككە 94 ۇپاي ەنشىلەگەن ا ق ش بالۋاندارى يە بولدى.
ال ەركىن كۇرەس بالۋاندارى الەم چەمپيوناتاندا ەكى كۇمىس، ءبىر قولا مەدال جەڭىپ الدى. سونداي-اق، 57، 65، 74، 97 كەلى سالماقتا وليمپيادا ويىندارىنا ءتورت جولداماعا يەلىك ەتتى.
اتاپ ايتار بولساق، نۇريسلام سانايەۆ (57 كەلى - قولا)، قىزىلوردالىق داۋلەت نيازبەكوۆ (65 كەلى - كۇمىس) جانە پەتروپاۆلدىق نۇرقوجا قايپانوۆ (70 كەلى - كۇمىس) مەدالعا يەلىك ەتتى. بۇل تىزىمگە الىشەر ەرعالي (97 كەلى)، عالىمجان وسەربايەۆ (79 كەلى)، ادىلەت داۋلىمبايەۆ (86 كەلى) قوسىلار ەدى. ءبىراق ۇشەۋى دە قولا جۇلدە ءۇشىن تارتىستا ۇتىلدى.
سونىمەن، كۇرەس تۇرلەرىنەن ءوز ەلىمىزدە وتكەن الەم بىرىنشىلىگى تاعى دا «التىنسىز» اياقتالدى. ءبىراق قازاقستان بالۋاندارى توكيو وليمپياداسىنا كۇرەستىڭ ءۇش تۇرىنەن جالپى 8 جولداماعا يەلىك ەتتى. گرەك-ريم كۇرەسىنىڭ بالۋاندارى – 2، ايەلدەر كۇرەسىنىڭ بالۋاندارى - 2 جولداماعا يە بولسا، ەڭ كوپ جولداماعا ەركىن كۇرەس شەبەرلەرى قول جەتكىزدى. ولاردىڭ ەنشىسىندە وليمپيادا ويىندارىنىڭ 4 جولداماسى بار.
وليمپيادالىق كۇرەس تۇرلەرىنەن وتكەن الەم چەمپيوناتىنىڭ جالپى ەسەبى:
گرەك-ريم كۇرەسى:
1. رەسەي
2. وزبەكستان
3. گرۋزيا
قازاقستان 5-ورىندا
ەركىن كۇرەس بويىنشا:
1. رەسەي
2. قازاقستان
3. ا ق ش
ايەلدەر كۇرەسى:
1. جاپونيا
2. رەسەي
3. ا ق ش
قازاقستان 6-ورىندا.
اۆتور:كۇنسۇلتان وتارباي