دارىگەرلەردىڭ كىناسىنەن مۇگەدەك بولىپ قالعان تۇرعىن سوت ارقىلى 7,5 ميلليون تەڭگە ءوندىرىپ الدى
22 اقپان 13:40

دارىگەرلەردىڭ كىناسىنەن مۇگەدەك بولىپ قالعان تۇرعىن سوت ارقىلى 7,5 ميلليون تەڭگە ءوندىرىپ الدى

كوكشەتاۋ. قازاقپارات - اقمولا وبلىسىندا دارىگەرلەردىڭ كىناسىنەن 1-توپتاعى مۇگەدەك بولىپ قالعان 62 جاستاعى تۇرعىن سوت ارقىلى 7,5 ميلليون تەڭگە كولەمىندە ءمورالدىق زياندى ءوندىرىپ الدى، دەپ حابارلايدى قازاقپارات ءتىلشىسى وبلىستىق سوتتىڭ باسپا ءسوز قىزمەتىنە سىلتەمە جاساپ.

اقمولا وبلىستىق سوتىنىڭ سۋدياسى، ب ا ق-پەن جۇمىس ۇيلەستىرۋشىسى نۇرجامال جۇماعۇلوۆانىڭ ايتۋىنشا، ايازدا ءۇسىتىپ العان ەكى اياعى اۋىرعان 62 جاستاعى ەر ادام 2021 -جىلدىڭ 5-قاڭتارىنان باستاپ، بەس رەت اۋرۋحانىڭ قابىلداۋ بولىمىنە دارىگەرلەردەن كومەك سۇراپ بارعان. الايدا، دارىگەرلەر وعان كومەك كورسەتۋدەن باس تارتقان. تەك سول جىلدىڭ 9-قاڭتارىندا عانا ەر ادام اۋرۋحاناعا «COVID-19 كوروناۆيرۋستىق ينفەكسياسى، ورتاشا اۋىرلىق. ىلەسپە اۋرۋ: بىلەك پەن اياق ايماعىنداعى تىندەردىڭ نەكروزىمەن ۇسىك شالۋ، ەكى اياقتىڭ ەكىنشى دارەجەلى ءۇسۋى» قورىتىندى دياگنوزىمەن جاتقىزىلدى.

«ناۋقاستا جەدەل پروگرەسسيۆتى ينفەكسيا جانە ەكى اياعىنىڭ دىمقىل گانگرەناسى دامىعانى ەسكەرىلىپ، 2021 -جىلدىڭ 11-قاڭتارىندا دارىگەرلەردىڭ كەڭەسىندە تىزە بۋىنىنان جوعارى امپۋتاتسيا ءۇشىن وتا جاساۋ تۋرالى شەشىم قابىلداندى. وسىلايشا، ەر ادام تەك ءتورتىنشى كۇنى اۋرۋحاناعا جاتقىزىلىپ، ال التىنشى كۇنى وتا جاسالدى»، - دەدى نۇرجامال جۇماعۇلوۆا.

ناۋقاسقا ءتيىستى مەديتسينالىق كومەك كورسەتپەگەندىكتەن، تولىق تەكسەرمەگەندىكتەن، ونىڭ جاي- كۇيىن تولىق باعالاماۋدان، سونداي- اق، 2021 -جىلعى 5 جانە 7-قاڭتاردا بىرنەشە رەت جۇگىنگەن كەزدە اۋرۋحاناعا جاتقىزۋدى كەيىنگە قالدىرۋ جانە ارەكەتسىزدىك سالدارىنان ناۋقاستىڭ اياعىنا امپۋتاتسيا جاسالىپ، مۇگەدەكتىكتىڭ 1-توبى بەرىلدى. بۇل ساراپتامالىق قورىتىندىمەن جانە اۋرۋحانانى جوسپاردان تىس تەكسەرۋ اكتىسىمەن راستالادى.

«ناۋقاس اۋرۋحاناعا مورالدىق زياندى وتەۋ تۋرالى سوتقا جۇگىندى. مورالدىق زياننىڭ مولشەرىن انىقتاۋ كەزىندە ءبىرىنشى ساتىداعى سوت ەر ادامنىڭ دەپرەسسيا، قورلاۋ، ۇمىتسىزدىك، زالال، دارمەنسىزدىك، جايسىزدىق، دەپرەسسيالىق كۇيدە بولۋ سەزىمدەرىنەن كورىنەتىن مورالدىق جانە فيزيكالىق ازاپتى باستان كەشىرگەنىن ەسكەردى جانە ۇتىمدىلىق پەن ادىلەتتىلىك قاعيداتتارىن ەسكەرە وتىرىپ، ونىڭ پايداسىنا اۋرۋحانادان 7500000 تەڭگە مولشەرىندە ءمورالدىق زياندى وتەۋدى ءوندىرىپ الدى. ءبىرىنشى ساتىداعى سوتتىڭ شەشىمىمەن كەلىسپەي، اۋرۋحانا ونىڭ كۇشىن جويۋدى جانە تالاپتى قاناعاتتاندىرۋدان باس تارتۋدى سۇرادى. الايدا، اپەللياتسيالىق سوتتىڭ قاۋلىسىمەن سوت شەشىمى وزگەرىسسىز قالدى، اۋرۋحانانىڭ اپەللياتسيالىق شاعىمى قاناعاتتاندىرىلمادى»، - دەپ تولىقتىردى نۇرجامال جۇماعۇلوۆا.

اۋرۋحانانى جوسپاردان تىس تەكسەرۋ ماتەريالدارى ق ر دەنساۋلىق ساقتاۋ مينيسترلىگى مەديتسينالىق جانە فارماتسيەۆتيكالىق باقىلاۋ كوميتەتىنىڭ دەپارتامەنتىمەن شەشىم قابىلداۋ ءۇشىن كوكشەتاۋ قالاسىنىڭ پوليتسيا باسقارماسىنا جانە اقمولا وبلىسىنىڭ دەنساۋلىق ساقتاۋ باسقارماسىنا جولداندى. «اقمولا وبلىسى پوليتسيا باسقارماسى تەرگەۋشىسىنىڭ قاۋلىسىنا سايكەس اۋرۋحانانىڭ مەديتسينا قىزمەتكەرلەرىنىڭ مەديتسينالىق كومەكتى تيىسىنشە كورسەتپەگەنى تۋرالى سوتقا دەيىنگى تەرگەۋ ماتەريالى بويىنشا ءىس جۇرگىزۋ توقتاتىلدى. تەكسەرۋ ناتيجەلەرى بويىنشا قابىلداۋ ءبولىمىنىڭ كەزەكشى دارىگەرلەرىن تارتىپتىك جاۋاپكەرشىلىككە تارتۋ تۋرالى دالەلدەر ۇسىنىلماعان. بۇيرىقتاردىڭ ۇزىندىلەرى بويىنشا حيرۋرگيا بولىمشەسىنىڭ دارىگەرلەرىمەن ەڭبەك شارتى بۇزىلدى»، - دەپ تۇيىندەدى نۇرجامال جۇماعۇلوۆا.

جاڭالىقتار