قازاقستاندا «7-20-25» ورنىنا جاڭا يپوتەكالىق باعدارلاما ىسكە قوسىلماق
5 شىلدە 11:42

قازاقستاندا «7-20-25» ورنىنا جاڭا يپوتەكالىق باعدارلاما ىسكە قوسىلماق

نۇر- سۇلتان. قازاقپارات - قازاقستان تۇرعىن ءۇي كومپانياسىنىڭ كەپىلدىگىمەن يپوتەكانىڭ جاڭا ءتۇرى ىسكە قوسىلۋى مۇمكىن، دەپ حابارلايدى قازاقپارات ءتىلشىسى.

بۇل تۋرالى «بايتەرەك» ۇلتتىق باسقارۋ حولدينگىنىڭ باسقارما ءتوراعاسى قانات شالاپايەۆ ايتتى.

«زەينەتاقى جيناقتارىنىڭ تۇرعىن ۇيگە جۇمساۋعا بولاتىن شەكتى مولشەرىنىڭ وسۋىنە جانە كەلەسى جىلى «7-20-25» باعدارلاماسىنىڭ اياقتالۋىنا بايلانىستى 500 ميلليارد تەڭگە يپوتەكاعا نەمەسە 35 مىڭ پاتەرگە دەگەن سۇرانىستىڭ تومەن بولۋى بولجانۋدا. جەكە قۇرىلىس سالۋشىلاردىڭ كوممەرتسيالىق تۇرعىن ءۇيدى ساتۋ جىلدامدىعى ايتارلىقتاي تومەندەۋى مۇمكىن. سۇرانىستىڭ وتەلمەۋىنە جول بەرمەۋ ماقساتىندا حالىق ءۇشىن ەكىنشى دەڭگەيلى بانكتەردىڭ نارىقتىق يپوتەكاسى بويىنشا سىياقى مولشەرلەمەسىن سۋبسيديالاۋ تەتىگىن ىسكە قوسۋ ۇسىنىلادى»، - دەدى ول ۇكىمەت وتىرىسىندا.

ايتۋىنشا، قازاقستان قارجىگەرلەر قاۋىمداستىعىمەن جۇرگىزىلگەن كەلىسسوزدەر ناتيجەسىندە مىناداي بازالىق شارتتار ۇسىنىلىپ وتىر. ول ۇسىنىستار مىناداي:

- باستاپقى جارنا 20 پايىزدان باستالاتىن؛

- كرەديت بەرۋ مەرزىمى 20 جىلعا دەيىن بولاتىن؛

- قارىزدىڭ ەڭ جوعارعى سوماسى 35 ميلليون تەڭگەگە دەيىن جەتەتىن؛

- تولەم قابىلەتتىلىگىن مىندەتتى تۇردە راستاۋدى قاجەت ەتەتىن يپوتەكانى ىسكە قوسۋ ۇسىنىلۋدا.

«ۇلتتىق بانكتىڭ بازالىق مولشەرلەمەسىنىڭ دەڭگەيىنەن % 5- دان اسپايتىن يپوتەكا بويىنشا سىياقى مولشەرلەمەسىنىڭ % 7 سۋبسيديالانادى. ەكىنشى دەڭگەيلى بانكتەر ءوز قاراجاتى ەسەبىنەن قۇرىلىس سالۋشىلاردىڭ باستاپقى تۇرعىن ۇيىنە جانە قازاقستان تۇرعىن ءۇي كومپانياسىنىڭ كەپىلدىگىمەن قامتاماسىز ەتىلگەن سالىنىپ جاتقان تۇرعىن ۇيگە قارىز بەرە الادى. وسى باعدارلامانى ىسكە قوسۋ ءۇشىن زاڭنامالىق وزگەرىستەر قاجەت ەمەس. قازىرگى ۋاقىتتا بيۋدجەتتىك ءوتىنىم قارجى مينيسترلىگىنىڭ قاراۋىندا. بيۋدجەت ماقۇلدانعاننان كەيىن، قازاقستاندىق تۇرعىن ءۇي كومپانياسى وسى باعدارلامانى دەرەۋ ىسكە قوسۋعا دايىن»، - دەدى قانات شالاپايەۆ.

ايتا كەتەيىك، ۇكىمەت وتىرىسىندا پرەمەر- مينيستر ارەندالىق تۇرعىن ءۇيدى ساتىپ الۋداعى زاڭناما قايشىلىعىن شەشۋدى تاپسىردى.


جاڭالىقتار