قازاقستاندا «7-20-25» - پەن كولىك ساتۋ قاشان باستالادى
«قازىرگى كەزدە ءبىز ۇلتتىق بانك پەن قازاقستاننىڭ دامۋ بانكىمەن اتالعان باعدارلامانى پىسىقتاپ جاتىرمىز. مەنىڭشە، ءبىر ايدىڭ ىشىندە ونى راسىمدەپ الامىز. سودان كەيىن ىسكە اسىرۋ شارالارى باستالادى. وسى باعدارلامانىڭ قارجىسى ءالى تۇسكەن جوق. سەبەبى ماماندار ونىڭ نەگىزگى شاراتتارىن ساراپتاپ جاتىر. پروتسەنتتىك مولشەرلەمە، نەگىزگى كەزەڭدەرى، ىسكە اسىرۋ تەتىكتەرى - وسىنىڭ ءبارىن جان- جاقتى قاراستىرىپ شىعۋ قاجەت»، - دەدى ا. لاۆرەنتيەۆ قازاقپارات تىلشىسىنە بەرگەن سۇحباتىندا.
ونىڭ ايتۋىنشا، ءبىر- ءبىر جارىم ايدىڭ ىشىندە جاڭا باعدارلاما تولىعىمەن دايىن بولادى. «جاڭا باعدارلاما ۇلتتىق بانكپەن بىرلەسىپ، ىسكە قوسىلادى. قازىرگى كەزدە باعدارلامانىڭ بارلىق پارامەترلەرى تالقىلانىپ جاتىر. سوسىن ونى ءتيىستى ورگاندارمەن كەلىسىپ الۋ قاجەت. بۇعان دەيىن بىزدە ءبىر اۆتونەسيە باعدارلاماسى قولعا الىنعان بولاتىن. تۋرا سونداي مەحانيزممەن جاڭا باعدارلاما دا ىسكە قوسىلاتىن بولادى»، - دەپ اتاپ كورسەتتى ا. لاۆرەنتيەۆ.
ايتا كەتەيىك، 2015 -جىلى 4 پايىزدىق اۆتونەسيە باعدارلاماسى قولعا الىنعان بولاتىن. سودان بەرى بيۋدجەتتەن 40 ميلليارد تەڭگە ءبولىندى. سونىڭ ارقاسىندا 13245 وتاندىق اۆتوكولىك جەڭىلدىكپەن ساتىلىپ، 747 كوممەرتسيالىق تەحنيكا ليزينگكە بەرىلدى.
اعىمداعى جىلى 19 - اقپاندا ۇكىمەت 4 پايىزدىق اۆتونەسيە باعدارلاماسىنا قوسىمشا 10 ميلليارد تەڭگەنى ءبولۋ تۋرالى قاۋلىنى قابىلداعان بولاتىن.
اۆتور: ارمان اسقاروۆ