ساعىنتايەۆ «7-20-25» باعدارلاماسى جايىندا: شىنىندا ءبىراز كەدەرگى بار
«ەلباسىنىڭ «بەس الەۋمەتتىك باستاماسى» - اۋقىمدى باعدارلاما. سوندىقتان ءبىز ءاربىر باستامانى ساپالى جۇزەگە اسىرۋعا مىندەتتىمىز. باياندامادان كورىپ وتىرعانىمىزداي، جالپى بارلىق باعىتتار بويىنشا جۇمىستار ورىندالىپ جاتىر. ءبىرىنشى باستاما (حالىقتى قولجەتىمدى باسپانامەن قامتۋ) بويىنشا جۇمىستى جالعاستىرۋ قاجەت. اسقار ۇزاقباي ۇلى (ۇكىمەت باسشىسىنىڭ ءبىرىنشى ورىنباسارى اسقار مامين) دانيار تالعات ۇلىنىڭ (ۇلتتىق بانك ءتوراعاسى دانيار اقىشەۆ) تاراپىنان ايتىلعان ۇسىنىستاردى وسى اپتانىڭ سوڭىنا دەيىن قاراپ، جۇما كۇنى شەشىمىن شىعارۋ كەرەك. شىن مانىندە ءبىراز كەدەرگى بار. ونىڭ ءبارىن جويىپ، باعدارلامانىڭ ءجۇرۋىن جىلدامداتۋىمىز قاجەت»، - دەدى ۇكىمەت باسشىسى.
پرەمەر-ءمينيستردىڭ ايتۋىنشا، «جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ» اتتى ەكىنشى باستاما ورىندالدى. 20 مىڭ ءبىلىم گرانتىن ءبولۋدى كوزدەيتىن ءۇشىنشى باستامانىڭ ءبىرىنشى بولىگى جۇمىسىن اياقتادى. ەكىنشى بولىگى ستۋدەنتتەردى جاتاقحانامەن قامتۋدى كوزدەيدى.
«ەرلان كەنجەعالي ۇلى (ءبىلىم جانە عىلىم ءمينيسترى ساعاديەۆ)، اكىمشىلىكتەرمەن بىرلەسە وتىرىپ، بۇگىنگى ايتىلعان ۇسىنىستاردىڭ بارلىعىن تاعى ءبىر پىسىقتاپ الۋ قاجەت. ەگەر بيىل 5 مىڭ جاتاقحانا ورنى تاپسىرىلۋى كەرەك بولسا، وندا سونىڭ بارلىعىن ورىنداۋىمىز قاجەت»، - دەدى باقىتجان ساعىنتايەۆ.
ۇكىمەت باسشىسىنىڭ سوزىنە قاراعاندا، حالىقتىڭ تابىسىنىڭ ارتۋىن قامتاماسىز ەتۋ ءۇشىن ءوزىن-ءوزى جۇمىسپەن قامتىعان جانە جۇمىسسىز حالىققا ميكرونەسيە بەرۋدى كوزدەيتىن ءتورتىنشى باستاما بويىنشا نەگىزىنەن ينديكاتورلىق كورسەتكىشتەرگە قول جەتكىزىلدى. ءبىراق تالاپ ەتىلگەن ساپاسى وتە تومەن. بۇل رەتتە ەڭبەك جانە حالىقتى الەۋمەتتىك قورعاۋ مينيسترلىگى تاراپىنان جۇرگىزىلگەن جۇمىستار دۇرىس ۇيلەستىرىلمەگەن ميكرونەسيەلەر 4 وڭىردەن باسقا وبلىستاردا 100 پايىزدان تومەن يگەرىلگەن.
«بەسىنشى باستاما ۋاقىتىندا سالىنىپ، ىسكە قوسىلۋىن قامتاماسىز ەتۋىمىز قاجەت. قانات الدابەرگەن ۇلى جۇمىس جۇرگىزىلىپ جاتىر، باقىلاۋىڭىزدا بولسىن»، - دەدى پرەمەر-مينيستر «سارىارقا» ماگيسترالدى گاز قۇبىرىنىڭ قۇرىلىسىنا جاۋاپتى ەنەرگەتيكا ءمينيسترى بوزىمبايەۆقا قاراتا.