باسپاناسى بار ازاماتتارعا دا «7-20-25» باعدارلاماسىنا قاتىسۋ قۇقىعى بەرىلمەك
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ۇلتتىق بانكىنىڭ ءتوراعاسى دانيار اقىشيەۆ ءمالىم ەتتى، دەپ حابارلايدى قازاقپارات ءتىلشىسى.
«باستاپقى جارنانى ازايتۋ ءۇشىن قىزمەتكەرلەردىڭ جەكەلەگەن ساناتتارىنا قولداۋ كورسەتىلۋدە. جەڭىلدىك بەرىلگەن يپوتەكا بويىنشا باستاپقى جارنانى سۋبسيديالاۋ تەتىگى ەنگىزىلدى. ول الەۋمەتتىك جانە بيۋدجەتتىك سالا قىزمەتكەرلەرىنە تۇرعىن ءۇي سەرتيفيكاتتارىن بەرۋ ارقىلى جۇزەگە اسىرىلادى. جەكەلەگەن وڭىرلەر تۇرعىن ءۇي سەرتيفيكاتتارىن بەرۋگە كىرىسىپ كەتتى. مىسالى، استانا اكىمدىگى 1 ميلليون تەڭگەگە باستاپقى جارنانى سۋبسيديالاۋ ءۇشىن مۇعالىمدەرگە، دارىگەرلەرگە جانە پوليتسيا قىزمەتكەرلەرىنە 100 سەرتيفيكات بەردى»، - دەدى ۇلتتىق بانك ءتوراعاسى.
وسى رەتتە ول تۇرعىن ءۇي سەرتيفيكاتتارىن بەرۋ ناقتى سيپاتتا بولۋعا تيىستىگىن جانە باعدارلاما باسىندا عانا بولۋى مۇمكىن ەكەندىگىن باسا ايتتى.
«باعدارلاماعا قاتىسۋ تالاپتارىنىڭ ءبىرى - مەنشىك قۇقىعىندا باسپانانىڭ بولماۋى. سونىمەن قاتار ازاماتتاردىڭ مەنشىكتى باسپاناسى بولىپ، قوسىمشا باسپانا تالاپ ەتىلەتىن كوپتەگەن جاعداي دا بار. بۇل تۇرعىن ءۇي تالاپتارىن جاقسارتاتىن كوپ بالالى وتباسىلار، بالالارىنا باسپانا ساتىپ الاتىن اتا- انالار، باسقا گەوگرافيالىق وڭىرگە كوشەتىن ازاماتتار بولۋى مۇمكىن. حالىقتىڭ قاجەتتىلىگىن نازارعا الا وتىرىپ، ۇلتتىق بانك ۇكىمەتكە باعدارلاماعا مەنشىك قۇقىعىندا باسپاناسى بار ازاماتتارعا قاتىسۋ قۇقىعىن بەرۋ مۇمكىندىگىن زەردەلەۋدى ۇسىنادى»، - دەدى د. اقىشيەۆ.
اۆتور: مارلان جيەمباي