ءلاززات يبراگيموۆا: «7-20-25» باعدارلاماسى بىزگە باسەكەلەس ەمەس

None
None
استانا. قازاقپارات - «قازاقستاننىڭ تۇرعىن ءۇي قۇرىلىس جيناق بانكى» «7-20-25» باعدارلاماسىنا نەگە قاتىسپايدى.

بۇل ساۋالدىڭ جاۋابىن بۇگىن ۇكىمەت ۇيىندە وتكەن باسپا ءسوز ءماسليحاتىندا بانكتىڭ باسقارما ءتوراعاسى ءلاززات يبراگيموۆا بەردى، دەپ حابارلايدى قازاقپارات ءتىلشىسى.

«ءبىز كلاسسيكالىق يپوتەكالىق بانك ەمەسپىز. ءبىز - تۇرعىن ءۇي قۇرىلىس جيناقتاۋشىمىز. جۇيەمىز مىناداي، العاشقى جارناما 20 پايىز بولىپ، ادام 50 پايىزىن جيناسا دا، ءتىپتى نەسيەسى بولسا دا تۇرعىن ءۇي زاەمىنىڭ تومەندەتىلگەن ستاۆكاسىنا كوشۋى ءتيىس. ال «7-20-25» باعدارلاماسىندا ستاۆكا 25 جىل بويى 7 پايىز بولىپ بەلگىلەنگەن. ال بىزدە جىلدىق نە 5 پايىزعا، نە 3,5 پايىزعا اۋىسۋ ۇنەمى بولىپ تۇرادى»، - دەدى بانك باسشىسى.

دەگەنمەن، ول «7-20-25» باعدارلاماسىنا قاتىسۋدىڭ وڭتايلى جولدارى وسى جىلدىڭ 1- جارتىجىلدىعىندا تابىلىپ قالۋى مۇمكىن ەكەندىگىن دە ايتتى. ونىڭ سوزىنە قاراعاندا، اتالعان باعدارلاما ىسكە قوسىلعاننان كەيىن دە بانك سالىمشىلارىنىڭ ەشقايسىسى ءوز قاراجاتتارىن الىپ كەتپەگەن.

«ويتكەنى، كوممەرتسيالىق بانكتەردىڭ تولەم قابىلەتتى باعالاۋى كىرىسى 300 مىڭ تەڭگەدەن اساتىن ادامدارعا عانا وتۋگە مۇمكىندىك بەرەدى. ال ءبىز كىرىسى ءتىپتى 250 مىڭ تەڭگەدەن دە تومەن حالىقپەن جۇمىس ىستەيمىز. سوندىقتان سالىمشىلارىمىزعا تولەم قابىلەتىن باعالاۋدان وتۋگە كەڭەس بەرەمىز. ادەتتە ولار باس تارتۋعا تاپ بولىپ، بىزگە ورالىپ جاتادى»، - دەدى ءلاززات يبراگيموۆا.

ونىڭ ايتۋىنشا، 2018-جىلى «قازاقستاننىڭ تۇرعىن ءۇي قۇرىلىس جيناق بانكىندە» 380 جاڭا دەپوزيت اشىلعان.

«كوممەرتسيالىق بانكتەر باس تارتقاندار بىزدە كىرىسى 200 مىڭ، 150 مىڭ تەڭگەدەن دە تومەن ادامداردىڭ زاەم مەن نەسيە العاندىعىن كورىپ، «قازاقستاننىڭ تۇرعىن ءۇي قۇرىلىس جيناق بانكىنە» كەلىپ جاتىر»، - دەدى ول.

ونىڭ سوزىنە قاراعاندا، «قازاقستاننىڭ تۇرعىن ءۇي قۇرىلىس جيناق بانكىندە» «7-20-25» باعدارلاماسىنا ۇقساس شارتتار دا بار. اتالعان شارتقا سايكەس باستاپقى 20 پايىز جارنا جيناعان ازاماتتارعا نەسيە جىلىنا 7 پايىزدىق ستاۆكامەن بەرىلەدى.

سوڭعى جاڭالىقتار