باسپانا « 7-20-25 » باعدارلاماسىنىڭ نەسيەسىن ونلاين ماقۇلداۋعا بولادى
«ءبىز قازىر وسى جوبا بويىنشا جۇمىس جاساپ جاتىرمىز. جاڭا جوبا بولاشاق كليەنتتەرگە نەسيەنى ونلاين ماقۇلداۋعا مۇمكىندىك بەرەدى. بۇل يپوتەكالىق كالكۋلياتور ەمەس، نەسيەنى ماقۇلداۋ. ول ءۇشىن بانككە كەلىپ ۋاقىت شىعىنداۋدىڭ قاجەتى جوق. بىرىنشىدەن، بارلىق اقپارات ءبىرىنشى نەسيە بيۋروسىندا بار. ەكىنشىدەن، ادامنىڭ تابىسى جايلى اقپاراتتى ءبىز زەينەتاقى تولەمدەرى بويىنشا مەملەكەتتىك ورتالىقتان، مالىمەتتەردىڭ مەملەكەتتىك دەرەكقورىنان الامىز. ءبىز كليەنت تۋرالى اقپاراتتى تولىق بىلەتىن بولامىز. ارينە، تەك ونىڭ رۇقساتىمەن عانا»، - دەدى قايرات التىنبەكوۆ.
ونىڭ ايتۋىنشا، بارلىق اقپارات اۆتوماتتى رەجىمدە وڭدەلىپ، قۇزىرلى ورگاندار نەسيەنى ماقۇلداۋ تۋرالى شەشىم شىعارا الادى.
ودان ءارى ەلەكتروندى نەسيە ءىسى جاسالادى. بۇل بانككە قاعاز قۇجاتتاردى تاسۋدىڭ قاجەتتىلىگىن جويادى.
«قازىر ءبىز وسى پيلوتتىق جوبانى قولعا الىپ جاتىرمىز. كەلەر جىلدىڭ باسىندا بۇل جۇيە تولىق ىسكە قوسىلاتىن بولادى. جاڭا جوبا كليەنتتەردىڭ نەسيە الۋ جىلدامدىعىن جاقسارتىپ، بانكتىڭ شىعىندارىن قىسقارتادى. نەسيەنى بەرۋ ءۇشىن وعان اۋديت جاساۋدىڭ قاجەتتىلىگى بولمايدى»، - دەدى قايرات التىنبەكوۆ.
ايتا كەتسەك، ق ر ۇلتتىق بانكى ءتوراعاسى اتالعان باعدارلامانىڭ وپەراتورى «باسپانا» يپوتەكالىق ۇيىمى بولاتىنىن 5 - مامىردا ايتقان ەدى. ۇلتتىق بانك بەكىتكەن باعدارلاما بويىنشا يپوتەكالىق قارىزدار 7 پايىز جىلدىق مولشەرلەمەمەن 25 جىلعا بەرىلەدى. كەلەسى شارتتارىنىڭ ءبىرى - العاشقى سالىم % 20 بولماق. جاڭا يپوتەكالىق زايمداردى قازاقستاننىڭ كەز كەلگەن ازاماتى الا الادى. ول ءۇشىن ەڭ باستى شارت - ادامنىڭ باسىندا جىلجىمايتىن مۇلكى بولماۋى كەرەك.
ەلباسى نۇرسۇلتان نازاربايەۆتىڭ قازاقستان حالقىنا جولداۋىندا بەرىلگەن تاپسىرمالارعا سايكەس، «7-20-25» باعدارلاماسىنا قاتىسۋعا نيەت بىلدىرگەن ازاماتتاردىڭ العاشقى جارناسىن ارزانداتۋ ءۇشىن جالپى سانى 50 مىڭ دانادان كەم ەمەس تۇرعىن ءۇي سەرتيفيكاتتارى شىعارىلاتىن بولادى.
قازىرگى تاڭدا قازاقستان بويىنشا قۇنى 50 ميلليارد تەڭگە بولاتىن وتىنىمدەر قابىلدادى. ونىڭ ىشىندە 35 ميلليارد تەڭگەنىڭ نەسيەلەرى ماقۇلداندى.
اۆتور: گۇلميرا عوسمانالي