باسپانا باسشىسى «7-20-25» باعدارلاماسى جونىندە ايتىپ بەردى
«ءبىزدىڭ ارىپتەس بانكتەر قۇنى 50 ميلليارد تەڭگە بولاتىن ءوتىنىم قابىلدادى. ونىڭ ىشىندە 35 ميلليارد تەڭگەنىڭ نەسيەلەرى ماقۇلداندى. بۇگىندە يپوتەكالىق ۇيىممەن 7 بانك سەرىكتەسە جۇمىس جاساپ جاتىر. ءبىز يپوتەكالىق نارىقتىڭ ينفراقۇرىلىمىن جاقسارتاتىن، كرەديتورلاردىڭ قۇقىعىن قورعايتىن، بيزنەس- پروتسەستەردى اۆتوماتتاندىراتىن، بارلىق نارىققا ءتيىمدى ىقپال ەتەتىن دۇنيەلەردى قولعا الماقپىز»، - دەدى قايرات التىنبەكوۆ پانەلدى وتىرىستا.
ايتا كەتسەك، ق ر ۇلتتىق بانكى ءتوراعاسى اتالعان باعدارلامانىڭ وپەراتورى «باسپانا» يپوتەكالىق ۇيىمى بولاتىنىن 5 - مامىردا ءمالىم ەتكەن ەدى. ۇلتتىق بانك بەكىتكەن باعدارلاما بويىنشا يپوتەكالىق قارىزدار % 7 جىلدىق مولشەرلەمەمەن 25 جىلعا بەرىلەدى. كەلەسى شارتتارىنىڭ ءبىرى - العاشقى سالىم % 20 بولماق. جاڭا يپوتەكالىق زايمداردى ق ر كەز كەلگەن ازامات الا الادى. ول ءۇشىن ەڭ باستى شارت - ادامنىڭ باسىندا جىلجىمايتىن مۇلكى بولماۋى كەرەك. باعدارلاما بويىنشا قازاقستاننىڭ كەز كەلگەن وڭىرىنەن الماتى، استانا، اتىراۋ جانە شىمكەنت قالالارىنان ەڭ ماكسيمالدى 25 ميلليون تەڭگەگە، قالعان وڭىرلەردە 15 ميلليون تەڭگەگە باسپانا ساتىپ الۋعا بولادى.
ەلباسى نۇرسۇلتان نازاربايەۆتىڭ قازاقستان حالقىنا جولداۋىندا بەرىلگەن تاپسىرمالارعا سايكەس، «7-20-25» باعدارلاماسىنا قاتىسۋعا نيەت بىلدىرگەن ازاماتتاردىڭ العاشقى جارناسىن ارزانداتۋ ءۇشىن جالپى سانى 50 مىڭ دانادان كەم ەمەس تۇرعىن ءۇي سەرتيفيكاتتارى شىعارىلاتىن بولادى.
اۆتور: گۇلميرا عوسمانالي