حالىققا «7-20-25» باعدارلاماسى بويىنشا قولدانىستاعى ۇيلەردى ساتىپ الۋ مۇمكىندىگى بەرىلە مە؟
استانادا ءوتىپ جاتقان «نۇر وتان» پارتياسى باستاۋىش ۇيىمدارىنىڭ رەسپۋبليكالىق فورۋمىندا تيمۋر سۇلەيمەنوۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
فورۋم بارىسىندا مينيسترگە ««7-20-25» باعدارلاماسى بويىنشا ەكىنشى دەڭگەيدەگى تۇرعىن ءۇيدى پايدالانۋ مۇمكىندىكتەرى قاراستىرىلىپ جاتىر ما؟ وتباسىلىق تابىسى 100 مىڭ تەڭگەلىك، ءبىراق ەكى-ءۇش بالاسى بار ادامدارعا باعدارلاما بويىنشا باسپانا الۋ وتە قيىن. كىرىسى تومەن وتباسىلارعا باعدارلاما بويىنشا باسپانا الۋ ماسەلەسى قالاي شەشىلەدى» دەگەن سۇراق قويىلدى.
بۇعان جاۋاپ بەرگەن تيمۋر سۇلەيمەنوۆ باعدارلاما بويىنشا العاشقى جارنانى سۋبسيديالاۋ جەرگىلىكتى بيۋجەت ماسەلەسى ەكەنىن اتاپ ءوتتى.
«ءبىزدىڭ اكىمدىكتەرمەن بىرگە اتقارعان جۇمىسىمىزدان كورىنگەندەي، جەرگىلىكتى بيۋجەتتە اقشا بارشىلىق. باعدارلاما ءوزىڭىز بىلەتىندەي ەندى عانا اۋقىم الىپ كەلەدى. اكىمدىكتەر وزىنە قاجەتتى قاراجاتتىڭ جەتىسپەي جاتقانى تۋرالى ماسەلەنى كوتەرىپ وتىرعان جوق. ال جاڭا ۇيلەردەن بولەك، قولدانىستاعى ءۇيدى باعدارلاما بويىنشا الۋ مۇمكىندىگىن بەرۋ تۋرالى سۇراق بىرنەشە رەت كوتەرىلگەن بولاتىن. ءوزىڭىز بىلەتىندەي، بۇل باعدارلاما ارقىلى بىرىنشىدەن ازاماتتاردى باسپانامەن قامتۋ كوزدەلسە، ەكىنشىدەن قۇرىلىس قارقىنىن ۇدەتۋ كوزدەلگەن. دەمەك، مەملەكەت بەرىپ جاتقان قاراجات بارىنشا ءتيىمدى جۇمسالسا دەگەن ماقسات بار. سوندىقتان، ءبىز ادامدارعا سۋبسيديا بەرگەن كەزدە ولار ءۇي الىپ، سونىمەن قاتار جاڭا ءۇي بوي كوتەرىپ جاتسا، ءبىز جۇمىس ورىندارى اشىلىپ، سالىقتىڭ تولەنۋىنە قول جەتكىزەمىز. باعدارلامانىڭ جۇزەگە اسىرىلىپ جاتقانىنا جوق دەگەندە ءبىر جىل تولماي جاتىپ، ەكىنشى دەڭگەيلى (ياعني، قولدانىستاعى ۇيلەردى) ۇيلەردى ساتىپ الۋ مۇمكىندىگىن قاراستىرىپ جاتقان جوقپىز. ايتپەسە، ءبىز جاڭا ۇيلەردى تۇرعىزۋ مىندەتىن ورىنداي الماي قالۋىمىز مۇمكىن»، - دەدى تيمۋر سۇلەيمەنوۆ.
ۇلتتىق ەكونوميكا ءمينيسترى سونىمەن قاتار، كىرىسى جەتكىلىكسىز وتباسىلار ءۇشىن العاشقى جارنانى تومەندەتۋ تۋرالى سۇراققا دا جاۋاپ بەردى.
«مەنىڭ ويىمشا، بۇل باعدارلاما الەۋمەتتىك تۇرعىن ءۇي باعدارلاماسى ەمەس ەكەنىن ەسكەرۋ كەرەك. ياعني، راتسيونالدى، پراگماتيكالىق مىنەزدەمەگە يە، جۇمىسىن ىستەپ، زەينەتاقى اۋدارىمىن جاساپ وتىرعان ادام ءوزى ءۇشىن دەپوزيت نەمەسە تۇرعىن-ءۇي جيناق بانكى ارقىلى اقشاسىن جيناپ، باسپانا الۋ قۇقىعىنا يە بولۋى كەرەك. «7-20-25» باعدارلاماسىنان بولەك، ەلىمىزدە الەۋمەتتى تۇرعىن ءۇي باعدارلاماسى بارىن ەسكەرۋ كەرەك. مەملەكەت ونداي توپتاعى ادامداردى شەتكە ىسىرىپ تاستادى دەپ ايتۋعا بولمايدى. ول باعدارلامالاردىڭ دا اۋقىمى كەڭەيە بەرەدى. ءبىراق، «7-20-25» باعدارلاماسى بەلگىلى ءبىر جيناعى بار ادامدار ءۇشىن ارنالعان»، - دەدى تيمۋر سۇلەيمەنوۆ.
ەسكە سالا كەتسەك، ەلورداداعى كونگرەس-ورتالىقتا «نۇر وتان» پارتياسىنىڭ باستاۋىش ۇيىمدارىنىڭ رەسپۋبليكالىق فورۋمى ءوتىپ جاتىر.