جولداۋ: «7-20-25» بويىنشا مۇعالىمدەر مەن دارىگەرلەرگە باستاپقى جارنا تومەندەيدى

استانا. قازاقپارات - ەلباسىنىڭ جولداۋىن جۇزەگە اسىرۋ اياسىندا پەداگوگتار مەن دارىگەرلەرگە جانە پوليسەيلەرگە «7-20-25» باعدارلاماسى بويىنشا باستاپقى جارنا تومەندەتىلەدى.

بۇل تۋرالى «باسپانا» يپوتەكالىق ۇيىمى» اق باسقارما ءتوراعاسى قايرات التىنبەكوۆ ءمالىم ەتتى، دەپ حابارلايدى قازاقپارات.

«مەملەكەت باسشىسىنىڭ قازاقستان حالقىنا جولداۋىندا بەرىلگەن ناقتى تاپسىرمالارىن جۇزەگە اسىرۋ ماقساتىندا، بىلىكتى ۇستازدار، دارىگەرلەر، پوليسيا قىزمەتكەرلەرى جانە وڭىرگە قاجەت باسقا دا ماماندىق يەلەرىنە «7-20-25» باعدارلاماسىنىڭ باستاپقى جارناسىن تومەندەتۋ بويىنشا جۇمىستار باستالدى. قازىرگى تاڭدا شىمكەنت قالاسى، اقتوبە، الماتى، پاۆلودار، سولتۇستىك قازاقستان وبلىستارىنىڭ اكىمدىكتەرىمەن ءتيىستى مەموراندۋمدارعا قول قويىلدى» ، - دەدى قايرات التىنبەكوۆ پارلامەنت سەناتىنىڭ دەپۋتاتتارىمەن وتكەن كەزدەسۋدە.

بۇدان بۇرىن حابارلانعانداي، قايرات التىنبەكوۆ سەنات دەپۋتاتتارىنا «7-20-25» باعدارلاماسىنىڭ جۇزەگە اسىرىلۋ بارىسىن باياندادى.

ونىڭ اتاپ وتۋىنشە، باعدارلاماعا تۇرعىن ءۇي قۇرىلىس جيناق بانكى مەن سبەربانك قاتىسۋى مۇمكىن.