مينيستر «7-20-25» باعدارلاماسىنىڭ اياسىندا پاتەر تاپشىلىعىنا قاتىستى اقپاراتقا جاۋاپ بەردى

استانا. قازاقپارات - ق ر ينۆەستيتسيالار جانە دامۋ ءمينيسترى جەڭىس قاسىمبەك «7-20-25» باعدارلاماسىنىڭ اياسىندا پاتەر تاپشىلىعى بولمايتىنىن ءمالىم ەتتى، دەپ حابارلايدى قازاقپارات.

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا «باسپانا» اكسيونەرلىك قوعامىنىڭ «7-20-25» باعدارلاماسىن ىسكە اسىرۋ ءۇشىن پاتەرلەردىڭ جوقتىعى تۋرالى ايتقانى شىندىققا جاناسادى ما جانە بۇگىندە جاعداي راسىمەن سولاي ما؟» دەگەن ساۋال قويىلدى.

«وسى جايىندا مالىمەتتى ەستىگەن بولاتىنمىن. بۇعان دەيىن اتاپ وتكەنىمدەي، وسى جىلدىڭ سوڭىنا دەيىن 100 مىڭنان استام باسپانانى تاپسىرامىز. ونىڭ 35 پايىزى جەكە ۇيلەر بولسا، قالعان 65 پايىزى كوپ پاتەرلى تۇرعىن ۇيلەر. سوندىقتان جىلدىڭ سوڭىنا دەيىن ەڭ از دەگەندە 65 مىڭ كوپ پاتەرلى ۇيلەر پايدالانۋعا بەرىلەتىن بولادى»، - دەدى جەڭىس قاسىمبەك.

ونىڭ سوزىنە قاراعاندا باعدارلاما اياسىندا باسپانا تاپشىلىعى بولمايدى.

«ءبىزدىڭ ويىمىزشا، «7-20-25» باعدارلاماسىنا كەرەك بولسا، اتالعان ۇيلەردىڭ جارتىسىن دا بەرە الامىز. اتاپ ايتقاندا، پاتەر جەتكىلىكتى. سايكەسىنشە، باسپانا تاپشىلىعى ماسەلەسى بولمايدى»، - دەپ ءتۇيدى جەڭىس قاسىمبەك.

بۇدان بۇرىن حابارلانعانداي، «باسپانا» يپوتەكالىق ۇيىمىنىڭ مالىمەتى بويىنشا باعدارلاما باستالعالى تەك ەكى ايدا قاتىسۋشى بانكتەرگە يپوتەكا الۋعا 2562 ءوتىنىم كەلىپ ءتۇستى. ونىڭ ىشىندە بۇگىندە جالپى 20 ميلليارد تەنگەدەن استام سوماعا 1695 يپوتەكالىق قارىز بەرۋگە قولداۋ جاسالدى. قالعان وتىنىمدەر بانكتەردىڭ قاراۋىندا جاتىر.