مەملەكەتتىك «7-20-25» باعدارلاماسىنا وزگەرىستەر ەنگىزىلدى

استانا. قازاقپارات - بۇگىندە «7-20-25» باعدارلاماسى بويىنشا تەك دايىن قۇجاتتارى بار باسپاناعا عانا يپوتەكا بەرىلەدى.

ال پاتەرلەردىڭ باسىم بولىگى قۇرىلىس جۇمىستارى كەزىندە ساتىلىپ كەتەدى. سودان جاڭا باعدارالاماعا باسپانا از قالادى. وسىعان بايلانىستى «7-20-25» اياسىندا ارنايى تۇرعىن ۇيلەردى سالۋ جوسپارلانعان، دەپ حابارلايدى قازاقپارات ءتىلشىسى.

«باسپانا» يپوتەكالىق كومپانياسىنىڭ باسشىسى قايرات التىنبەكوۆتىڭ ايتۋىنشا، بۇگىندە باعدارلاماعا وزگەرىستەر ەنگىزىلدى. سوعان سايكەس، «7-20-25» اياسىندا جەرگىلىكتى اكىمدىكتەرگە 150 ميلليارد تەڭگە بولىنەدى. ول اقشاعا جاڭا ۇيلەر سالىنۋى ءتيىس.

«ماسەلەن، قازىرگى كەزدە سولتۇستىك قازاقستان مەن تۇركىستان وبلىستارىندا «7-20-25» باعدارلاماسى بويىنشا بەرىلگەن يپوتەكانىڭ كولەمى تىم از. سەبەبى، اتالعان وڭىرلەردە جاڭا تۇرعىن ۇيلەر كوپ ەمەس. وسىعان بايلانىستى ۇلتتىق بانك «باسپانا» يپوتەكالىق كومپانياسىمەن بىرلەسە وتىرىپ، «7-20-25» باعدارلاماسىنا وزگەرىس ەنگىزدى. وعان سايكەس، ءبىز باعدارلاما اياسىندا سالىناتىن جاڭا ۇيلەردى ارتتىرۋ ءۇشىن شامامەن 150 ميلليارد تەڭگەنى بولۋگە ءازىرمىز» - دەدى ق. التىنبەكوۆ استانادا وتكەن باسپا ءسوز ءماسليحاتىندا.

ونىڭ سوزىنە قاراعاندا، جاڭا باعدارلاماعا سۇرانىس جوعارى. الايدا، ۇسىنىس ماردىمسىز بولىپ تۇر. ماسەلەن، وسى ۋاقىتقا دەيىن ەكىنشى دەڭگەيلى بانكتەرگە 26 ميلليارد تەڭگەگە وتىنىمدەر ءتۇستى. سونىڭ ىشىندە 18 ميلليارد تەڭگەنىڭ يپوتەكاسى ماقۇلداندى. ول - شامامەن 1 500 پاتەر.

ايتا كەتەيىك، بۇگىننەن باستاپ «باسپانا- حيت» اتتى جاڭا يپوتەكا بەرىلە باستادى. وعان قايتالاما نارىقتان پاتەر ساتىپ الۋعا بولادى. العاشقى جارنانىڭ كولەمى وزگەرمەيدى. الايدا، پروتسەنتتىك مولشەرلەمە ۇلتتىق بانكتىڭ ستاۆكاسىنا بايلانىستى بولادى.

«ماسەلەن، ۇلتتىق بانكتىڭ بازالىق ستاۆكاسى 9 پروتسەنتتى قۇرايدى. وعان تاعى 1,7 پروتسەنت قوسىلادى. وسىلايشا، «باسپانا- حيت» باعدارلاماسى بويىنشا پروتسەنتتىك مولشەرلەمە 10,7 بولادى. يپوتەكانىڭ مەرزىمى - 15 جىل. ال باستاپقى جارنانىڭ مولشەرى 20 پروتسەنت بولىپ قالا بەرەدى»، - دەيدى ق. التىنبەكوۆ.