استانادا «7-20-25» باعدارلاماسىمەن قاي ۇيلەردەن پاتەر الۋعا بولادى؟
قازاقستان ريەلتورلار قاۋىمداستىعىنىڭ ۆيتسە-پرەزيدەنتى جانە «DIXI» جىلجىمايتىن مۇلىك اگەنتتىگىنىڭ ديرەكتورى نينا لۋكيانەنكونىڭ ايتۋىنشا، باعدارلاما باسپانا قۇنىنا ايتارلىقتاي ىقپالىن تيگىزبەيدى.
«جاڭا باعدارلامانىڭ ەنگىزىلۋىنەن باعالاردىڭ وزگەرۋى بايقالعان جوق. سەبەبى، بۇل باعدارلاما بەلگىلى ءبىر قارىز الۋشىلار مەن باسپانالارعا عانا ارنالعان. سوندىقتان، باعدارلاما ارقىلى باسپانا ساتىلىمى كوبەيدى دەپ ايتۋعا دا كەلمەيدى»، - دەدى نينا لۋكيانەنكو قازاقپارات تىلشىسىنە بەرگەن سۇحباتىندا.
ونىڭ ايتۋىنشا، قازاقستاندىقتار سۋ جاڭا پاتەردىڭ عانا ەمەس، بۇرىنىراق قولدانىسقا بەرىلگەن پاتەرلەردىڭ دە باعدارلاماسىن كۇتىپ وتىر.
«مەنىڭ بىلۋىمشە، بۇل تاقىرىپ ۇكىمەتتىك دەڭگەيدە تالقىلانىپ جاتىر. بالكىم، ءدال وسى باعدارلاما اياسىندا ەسكىرەك پاتەرلەردى الۋعا رۇقسات بەرەتىن شىعار. قازىرگى باعدارلامانىڭ ءبىر تالابى - قولدانىسقا جاڭا بەرىلگەن نىساندار بولۋى قاجەت. سايكەسىنشە، جاڭا نىساندار قالانىڭ شەتىندە ورنالاسقان. سوندىقتان، جاڭا پاتەرلەر نارىعىندا ۇسىنىستار بار، ءبىراق كوپ ەمەس. بارلىق وڭىردە دەرلىك وسىنداي جاعداي بايقالىپ وتىر»، - دەپ ءوز ءسوزىن تۇيىندەدى ول.
ءوز كەزەگىندە قازاقستان قۇرىلىسشىلار وداعىنىڭ ءتوراعاسى تالعات ەرعاليەۆ جاڭا باسپانا نارىعىندا پاتەرلەردىڭ از ەكەنىن جەتكىزدى. وداق باسشىسىنىڭ ايتۋىنشا، تۇرعىن ءۇي كەشەنىندەگى پاتەرلەردىڭ %90 قۇرىلىس بارىسىندا ساتىلىپ كەتەدى دە، قولدانىسقا بەرىلگەندە %5-10 عانا قالادى.
«سوندىقتان قۇرىلىسشىلارعا %5-10 ءۇشىن بۇل باعدارلامامەن اينالىسۋ ءتيىمسىز. دايىن پاتەرلەر وتە از جانە بۇل پاتەرلەر ونسىز دا ساتىلىپ جاتىر. ءۇي قۇرىلىسىنىڭ ءوزى 1,5 ميلليارد - 5 ميلليارد تەڭگە ارالىعىندا باعالانادى. بۇل - ەكىجىلدىق پروتسەسس. سوندىقتان، دايىن پاتەردى باعدارلاما قۇنىمەن بەرۋ ولارعا ءتيىمسىز. پاتەردى ساتۋ ءۇشىن كەلىسىمشارتتار بەكىتۋ كەرەك، قۇجاتتاردى راسىمدەپ، بانككە قوسىمشا قاعازدار اپارۋ كەرەك. دايىن پاتەرلەردى ونسىز دا يپوتەكا نەمەسە تۇرعىن ءۇي قۇرىلىس جيناق بانكى ارقىلى ساتۋعا بولادى. سوندىقتان دا، ءۇي سالۋشىلار جاڭا باعدارلاماعا كەلە بەرمەيدى. ەگەر باعدارلاما تالاپتارىن جەڭىلدەتسە، ارينە باسقاشا بولار ەدى»، - دەپ ءتۇسىندىردى ول.
ساراپشىنىڭ ايتۋىنشا، حالىققا ەكىنشى، ءۇشىنشى قولدان پاتەر ساتىپ الۋعا رۇقسات بەرۋ قاجەت.
«جاڭا پاتەر مە، ەسكى پاتەر مە - ازاماتتىڭ ءوزى تاڭداۋى كەرەك. سوندا جاڭا پاتەرلەر نارىعى دا قىزا تۇسەدى. ەسكى پاتەرىن ساتقان ادامدار جاڭا پاتەر ىزدەي باستايدى. ايتپەسە، قازىرگى اياق الىسى وتە باياۋ»، - دەپ ەسەپتەيدى تالعات ەرعاليەۆ.
سونداي-اق، ساراپشى جاڭا پاتەرلەردىڭ از بولۋىنان باعاسى قىمباتتاپ كەتە مە دەپ قاۋىپ بىلدىرەدى.
«نارىقتا جاڭا پاتەر از جانە ولاردىڭ باعاسى قىمباتتايدى. بۇل نارىقتىڭ زاڭى، ونى مەن ويلاپ تاپقان جوقپىن»، - دەدى ول.
قازاقستان قۇرىلىسشىلار وداعى استانادا «7-20-25» باعدارلاماسىمەن پاتەر الۋعا بولاتىن قۇرىلىسشىلار مەن تۇرعىن ءۇي كەشەندەرىنىڭ ءتىزىمىن ۇسىندى.