استانادا «7-20-25» باعدارلاماسىمەن پاتەر الام دەۋشىلەرگە ءۇي جەتكىلىكتى - يسەكەشەۆ
استانادا جىل سايىن 2,3 ميلليون شارشى مەتر باسپانا پايدالانۋعا بەرىلەدى، سونىڭ كوبىسىنىڭ باعاسى «7-20-25» باعدارلاماسىنىڭ ولشەمىنە سايكەس كەلەدى.
«سوڭعى ءۇش جىلدا 7 ميلليون شارشى مەتر تۇرعىن ءۇي پايدالانۋعا بەرىلدى. بىزدە «7-20-25» باعدارلاماسىنىڭ ولشەمىمەن سايكەس كەلەتىن جاڭادان تۇرعىزىلعان باسپانالار جەتكىلىكتى. بۇگىندە «قازاقستاننىڭ تۇرعىن ءۇي قۇرىلىس جيناق بانكىمەن» بىرلەسىپ بىرنەشە جاڭا باعدارلامانى تالقىلاۋ ۇستىندەمىز»، - دەدى ءا. يسەكەشەۆ.
ونىڭ ايتۋىنشا، استانا حالقىن تۇرعىن ۇيمەن قامتاماسىز ەتۋ اياسىندا جاڭادان شاعىن اۋداندار سالىنادى.
«ءبىز قازىر ءبىراز جوبانى قولعا الىپ جاتىرمىز، ونىڭ كوبىسى - جەكە ينۆەستيتسيالار. ايتار بولساق، «بارىس ارەنا» مۇز ايدىنىنىڭ وڭ جانە سول جاق بەتىنەن شاعىن اۋداندار تۇرعىزۋ جوسپارلانۋدا. ودان بولەك، بۇگىندە تۇرعىن ءۇي ساتىپ الۋدا باعا نارىعىنا تۇزەتۋ ەنگىزىلگەن. قازىرگى نارىق باعاسى ءار شارشى مەترى - 240-300 مىڭ تەڭگە ارالىعىندا. كوپقاباتتى تۇرعىن ءۇي سالۋ نارىعىندا ءبىز الدا كەلەمىز. ونىڭ ۇستىنە، جىل سايىن استاناعا 50 مىڭنان 100 مىڭعا دەيىنگى ارالىقتا ادامدار كوشىپ كەلەدى. قالانىڭ بولاشاعىنا قاتىستى جوسپارلار مەن جۇكتەمەلەر كوپ»، - دەدى قالا اكىمى.
ايتا كەتەيىك، ۇستىمىزدەگى جىلدىڭ ناۋرىز ايىندا ەلباسى حالىقتى تۇرعىن ۇيمەن قامتاماسىز ەتۋ ماقساتىندا جاڭا يپوتەكالىق باعدارلامانى ازىرلەۋدى تاپسىرعان بولاتىن. «7-20-25» باعدارلاماسى بويىنشا ءاربىر جۇمىس ىستەيتىن ازاماتقا 20 پايىزدان اسپايتىن مولشەردە باستاپقى جارنامەن 25 جىلعا دەيىنگى مەرزىمگە، 7 پايىز ۇستەمەمەن يپوتەكا راسىمدەۋگە مۇمكىندىك بەرىلەدى.