ۇلتتىق بانك «7-20-25» باعدارلاماسىنىڭ شارتتارىن جاريا ەتتى

استانا. قازاقپارات - ق ر ۇلتتىق بانكى «7-20-25. ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ» يپوتەكالىق تۇرعىن ءۇي كرەديتتەۋ باعدارلاماسىن بەكىتتى، دەپ حابارلايدى قازاقپارات ءتىلشىسى.

«باعدارلاما اياسىندا قاتىسۋشى بانكتەرگە قاتىستى ولشەمشارتتار ايقىندالاتىن بولادى. قاتىسۋشى بانكتەردىڭ تىزبەسى ولار «باسپانا» يپوتەكالىق ۇيىمى» ا ق- مەن ءتيىستى شارتتار جاساسقان سوڭ قازاقستان رەسپۋبليكاسى ۇلتتىق بانكىنىڭ رەسمي ينتەرنەت- رەسۋرسىندا جاريالانادى. باعدارلامانىڭ تالاپتارىنا سايكەس قاتىسۋشى بانكتەردىڭ قارىزدار بەرۋ جانە قىزمەت كورسەتۋ ءۇشىن قارىز الۋشىلاردان كوميسسيا الۋعا قۇقىعى جوق»، - دەلىنگەن ۇلتتىق بانك تاراتقان اقپاراتتا.

سونىمەن قاتار قاتىسۋشى بانكتەردىڭ قارىزداردى بەرۋ راسىمدەرىنىڭ باستالعانى تۋرالى اقپارات قازاقستان ۇلتتىق بانكىنىڭ سايتىندا دا ورنالاستىرىلدى. «7-20-25» باعدارلاماسىن ىسكە اسىرا باستاۋدىڭ كۇتىلەتىن مەرزىمى - اعىمداعى جىلدىڭ ەكىنشى جارتىسى.

«7-20-25» باعدارلامانىڭ تالاپتارىن ءتۇسىندىرۋ ءۇشىن قازاقستان ۇلتتىق بانكىنىڭ «قۇب «Onlinە» موبيلدىك قوسىمشاسىندا 2018 -جىلعى 19 -ماۋسىمنان باستاپ «7-20-25» جاڭا ءبولىمى ىسكە قوسىلدى، وندا وسى باعدارلاماعا قاتىستى قىزىعۋشىلىق تۋدىراتىن سۇراقتارعا جەدەل جاۋاپ الۋعا بولادى.

ايتا كەتەرلىگى، باعدارلاما مەملەكەت باسشىسىنىڭ 2018 -جىلعى 5 -ناۋرىزداعى حالىققا ارنالعان «پرەزيدەنتتىڭ بەس الەۋمەتتىك باستاماسى» ۇندەۋىندە ايتىلعان ءبىرىنشى الەۋمەتتىك باستامانى ىسكە اسىرۋ اياسىندا ازىرلەندى. باعدارلاماعا قازاقستان رەسپۋبليكاسىنىڭ ەڭبەك جانە (نەمەسە) كاسىپكەرلىك قىزمەتتەن الاتىن تابىسى بار، سونداي-اق مەنشىك قۇقىعىندا تۇرعىن ءۇيى جوق كەز كەلگەن ازاماتى قاتىسا الادى.

ەلىمىزدىڭ كەز كەلگەن وڭىرىندە باستاپقى نارىقتا تۇرعىن ءۇي ساتىپ الۋ ءۇشىن مىناداي قۇن شەگىندە يپوتەكالىق تۇرعىن ءۇي قارىزىن الۋ مۇمكىندىگى قارالادى: 25 ميلليون تەڭگە - استانا، الماتى، اقتاۋ جانە اتىراۋ قالالارىندا؛ 15 ميلليون تەڭگە - باسقا وڭىرلەردە.

باعدارلامانىڭ وپەراتورى قازاقستان رەسپۋبليكاسى ۇلتتىق بانكىنىڭ ەنشىلەس ۇيىمى «باسپانا» يپوتەكالىق ۇيىمى» ا ق. وپەراتور وبليگاتسيالاردى شىعارۋ جانە ورنالاستىرۋ ەسەبىنەن قارجىلاندىرۋدىڭ نارىقتىق تەتىكتەرىن پايدالانا وتىرىپ قازاقستان قور بيرجاسىنا (KASE) كەمىندە 1 تريلليون تەڭگەنى تارتادى جانە تۇسكەن قاراجاتتى باعدارلامانىڭ تالاپتارى بويىنشا قاتىسۋشى بانكتەر بەرگەن يپوتەكالىق تۇرعىن ءۇي قارىزدارىن ساتىپ الۋعا باعىتتايدى.