جاڭا «7-20-25» باعدارلاماسىمەن باسپانا الامىن دەۋشىلەرگە 5 كەڭەس
وسى ۋاقىت ارالىعىندا «7-20-25» باعدارلاماسى بويىنشا قازاقستاندىقتاردى كوپ جاعدايدا قانداي سۇراقتار مازالايتىنىنا ۇلكەن تالداۋ جۇمىسى جۇرگىزىلدى. وسى ورايدا، «باسپانا» يپوتەكالىق ۇيىمىنىڭ باسشىسى قايرات التىنبەكوۆ اتالمىش باعدارلامامەن ءۇي الۋدى كوزدەپ جۇرگەن ازاماتتارعا بەس كەڭەسىن بەرىپ ءوتتى، دەپ حابارلايدى قازاقپارات ءتىلشىسى.
1. ەشقاشان توقتاپ قالماڭىز
«7-20-25» باعدارلاماسى بويىنشا ءۇي الۋدى شەشتىڭىز دەلىك. قۇتتىقتايمىن، ءسىز ماقساتقا جەتۋ جولىندا جارتى جولدى باسىپ ءوتتىڭىز. ەڭ باستىسى ءارى ماڭىزدىسى - شەشىم قابىلداۋ. جارتى جولدى باسىپ وتسەڭىز، ارتقا قارايلاۋدىڭ قاجەتى جوق. تەك العا باسىڭىز. پاتەردى تاۋىپ الىڭىز دا، سەنىمدى تۇردە ءۇي سالۋشىمەن كەلىسسوز جۇرگىزىڭىز. بانك ءۇشىن قۇجاتتاردىڭ تولىق پاكەتىن جيناقتاۋعا تىرىسىڭىز. كۇتىپ قالامىن دەپ جاسقانۋدىڭ قاجەتى جوق. بانك شەشىمىن نەمەسە سالۋشىمەن ساتۋ- ساتىپ الۋ كەلىسىمىن جاساۋدى كۇتۋ، قۇرىلىسشىلاردىڭ جۇمىسىنىڭ سوڭىن توسۋ بولسىن، مەيلى ۋاقىت وتسە دا اقىرىن توسىڭىز. ءۇي ماسەلەسى كۇتۋگە تۇرارلىق شارۋا.
2. يپوتەكا الۋدى ابدەن ويلانىپ شەشىڭىز
يپوتەكا - بۇل قارىز. سىيلىق تا، كومەك تە ەمەس. مىنە، سوندىقتان، زايم كەلىسىمىنە قول قويماس بۇرىن، ءبارىن قايتادان وي ەلەگىنەن وتكىزىپ العان دۇرىس. اي سايىنعى تولەمگە شاماڭىز جەتە مە؟ باعدارلاماعا قاتىسۋ ءۇشىن جەتكىلىكتى كىرىس كەرەك. بالكىم، بانكتەر ءوتىنىش بەرۋشىنىڭ تولەم قابىلەتىن ءجىتى تەكسەرەتىنىن بايقاعان بولارسىز. سەبەبى، باعدارلاما قارجىلىق تاۋەكەلدەرگە مەملەكەت ەمەس، بانكتەردىڭ وزدەرى باراتىنداي جاساقتالعان. بانكتەر نەسيە بويىنشا وزدەرى شەشىم قابىلدايدى. سەبەبى، مەملەكەت ەمەس، بانكتەر تاۋەكەلگە بارىپ وتىر.
ال ەگەر جەكە كاسىپكەر بولساڭىز نە ىستەۋ كەرەك؟
«7-20-25» باعدارلاماسىنىڭ ەرەجەلەرى جەكە كاسىپكەرلەردىڭ دە ءۇي الۋ مۇمكىندىگىنە جول اشىپ وتىر. ءبىراق، جەكە كاسىپكەرلەردىڭ قارجىلىق احۋالىن بانكتەر ميكروسكوپپەن قارايتىنداي دارەجەدە تەكسەرەتىنىن ءبىلىپ قويىڭىز. جەكە كاسىپكەر شىنىندا دا، جۇمىس ىستەپ جاتقان جاعدايدا وعان نەسيە بەرىلەدى. الايدا بانكتەردىڭ ءبارى دە جەكە كاسىپكەرلەرگە نەسيە بەرە قويمايتىنىن دا ەسكەرۋ كەرەك.
3. «7-20-25» باعدارلاماسى شەڭبەرىندەگى بارلىق اقپاراتتى تەكسەرىپ الىڭىز
«7-20-25» باعدارلاماسى قازىر حالىقتىڭ نازارىندا. وعان ايتىلاتىن سىن دا، ماقتاۋ دا جەتەرلىك. باعدارلاماعا ەشكىم سەلقوس قاراپ وتىرعان جوق. البەتتە، نارىق بۇل وزگەرىستەرگە جەدەل جاۋاپ قاتۋدا. «7-20-25» باعدارلاماسىنىڭ اينالاسىندا ءارتۇرلى مەردىگەرلەر، تۇرعىن ءۇي كووپەراتيۆتەرى، ميكروقارجىلىق ينستيتۋتتار مەن ءتىپتى جەكە ادامدار دا وزدەرىنىڭ كوممەرتسيالىق مۇددەلەرىن جۇرگىزۋ ۇستىندە. ءاردايىم اقپاراتتى تەكسەرىپ الىڭىز. «7-20-25» باعدارلاماسى بويىنشا يپوتەكانى: قۇرىلىس كومپانيالارى، ميكروقارجىلىق ۇيىمدار، تۇرعىن ءۇي كووپەراتيۆتەرى مەن جەكە ادامدار بەرمەيدى. تەك سەرىكتەس- بانكتەر عانا بەرەدى. ءسىزدىڭ نەگىزگى قارىزدىڭ قالدىعىنا قوسىلاتىن جىلدىق 7 پايىزدىق ستاۆكاڭىزدان باسقا ەشقانداي ارتىق تولەمىڭىز بولماۋى كەرەك.
اي سايىنعى تولەمدى ءارقاشان مىنا كەستە ارقىلى تەكسەرىپ الىڭىز:
باسپانا باعاسى
اي سايىنعى تولەم (25 جىلعا زايم العان جاعدايدا)
5 ميلليون تەڭگە.
28271 ت گ.
10 ميلليون ت گ.
56542 ت گ.
15 ميلليون. ت گ.
84814 ت گ.
20 ميلليون ت گ.
113085 ت گ.
25 ميلليون ت گ.
141356 ت گ.
4. تۇرعىن ءۇيدى سالۋشىمەن ساۋدالاسۋدان جاسقانباڭىز
كومپانيا باسپانانى نارىقتىق باعامەن سالىستىرعاندا قىمباتىراق ساتقىسى كەلۋى مۇمكىن. بانكتەر نەسيە بەرگەن كەزدە تاۋەلسىز باعالاۋشى ايقىنداعان باعانى نەگىزگە الادى. ماسەلەن، ەگەر ءۇي سالۋشى كومپانيا پاتەر باعاسىن 15 ميلليون تەڭگە دەسە، ال باعالاۋشى 12 ميلليون تەڭگە دەپ شەشتى دەلىك. وندا بانكتەر سىزگە 9,6 ميلليون تەڭگە نەسيە بەرۋگە دايىن بولادى. سونىمەن بىرگە، ونىڭ ۇستىنە 2,4 ميلليون تەڭگە - ول ءسىزدىڭ 12 ميلليون تەڭگەگە قوسار، 20 پايىزدىق العاشقى جارناڭىز. قالعان 3 ميلليون تەڭگەنى قايدان تابۋ كەرەك؟ بۇل رەتتە ءۇي سالۋشىمەن ساۋدالاسۋعا بولادى. ەگەر ورتاق كەلىسىمگە كەلە الماساڭىز، جەتپەي تۇرعان سومانى ءوز قالتاڭىزدان شىعاراسىز، بولماسا باسقا ءۇي ىزدەيسىز.
5. ءسىز يپوتەكانى 25 جىلعا الۋعا مىندەتتى ەمەسسىز
كوپتەگەن ازاماتتار «7-20-25» باعدارلاماسى بويىنشا ءۇي تەك 25 جىلعا بەرىلەدى دەپ ويلايدى. بۇل قاتە پىكىر. 25 جىل - نەسيە بەرىلەتىن ەڭ ۇزاق مەرزىم. الايدا مينيمالدى مەرزىم تۇرعىسىندا شەكتەۋ جوق. ءسىز يپوتەكانى 1 نەمەسە 5 جىلعا، بولماسا 10 جىلعا الا الاسىز. دەمەك، مەرزىمدى تەك ءوزىڭىز بەلگىلەي الاسىز.
نەسيەنى الدىن الا جابۋ مۇمكىندىگى دە سىزگە بەرىلەدى. ءسىز كەز كەلگەن ۋاقىتتا قارىزدى ۋاقىتىنان بۇرىن جاۋىپ، نەسيەنىڭ نەگىزگى قارىجىسىن ازايتا الاسىز. بۇنىڭ ءبارى دە قوسىمشا تولەم نەمەسە ايىپپۇل سانكسياسى ارقىلى جۇرگىزىلەدى. پايىزدار تەك نەسيەنىڭ كۇشى بار كەزەڭدە قوسىلادى. ماسەلەن، ءسىز 25 جىل مەرزىمگە 12 ميلليون تەڭگەلىك ءۇي الدىڭىز دەلىك. اي سايىنعى تولەمىڭىز، 68 مىڭ تەڭگە. ەگەر 25 جىل بويى تولەسەڭىز، 8 ميلليون تەڭگەدەن استام اقشا ارتىق تولەيسىز. الايدا ءسىز ءۇش جىلدان كەيىن قارىزدى ۋاقىتىنان بۇرىن جابۋدى كوزدەدىڭىز دەلىك. بۇل جاعدايدا ءسىزدىڭ قورىتىندى ارتىق تولەمىڭىزدىڭ مولشەرى تەك 1,9 ميلليون تەڭگە بولماق. قالعان 22 جىل بويى ارتىق پايىزدى تولەمەيسىز.
اۆتور: ايان بەكەن ۇلى