ەلۋ مىڭ ادامعا «7-20-25»-باعدارلاماسىنىڭ 1 ميلليون تەڭگەلىك سەرتيفيكاتى تاپسىرىلادى

None
None
استانا. قازاقپارات - ەلباسى نۇرسۇلتان نازاربايەۆتىڭ قازاقستان حالقىنا جولداۋىندا بەرىلگەن تاپسىرمالارعا سايكەس، «7-20-25» باعدارلاماسىنا قاتىسۋعا نيەت بىلدىرگەن ازاماتتاردىڭ العاشقى جارناسىن ارزانداتۋ ءۇشىن جالپى سانى 50 مىڭ دانادان كەم ەمەس تۇرعىن ءۇي سەرتيفيكاتتارى شىعارىلاتىن بولادى.

 «باسپانا» يپوتەكالىق ۇيىمىنىڭ باسپا ءسوز قىزمەتى تاراتقان مالىمەتكە ساي، قازاقستان حالقىنا جىل سوڭىنا دەيىن 10 مىڭداي سەرتيفيكات تاپسىرىلماق.

«7-20-25» سەرتيفيكاتتارى بيۋدجەتتىك سالا قىزمەتكەرلەرى ءۇشىن العاشقى جارنانى ەداۋىر جەڭىلدەتۋ ماقساتىندا ازىرلەنىپ وتىر. سەرتيفيكاتتاردى قالا جانە وبلىس اكىمدىكتەرى ءوز تۇرعىندارى اراسىندا ۇلەستىرەتىن بولادى.

«ەلباسى جەرگىلىكتى بيۋدجەتتەن جەڭىلدەتىلگەن يپوتەكانىڭ العاشقى جارناسىن سۋبسيديالاۋ بويىنشا جان- جاقتى جۇمىس جۇرگىزۋدى تاپسىردى. مەملەكەت باسشىسى مالىمدەگەندەي، مۇنداي تۇرعىن ءۇي سەرتيفيكاتتارىن بەرۋ مۇعالىمدەر، دارىگەرلەر، پوليتسيا قىزمەتكەرلەرى جانە باسقا دا جەرگىلىكتى وڭىرلەرگە قاجەتتى ماماندىق يەلەرى ءۇشىن يپوتەكانىڭ قولجەتىمدىلىگىن ارتتىرا تۇسپەك. ءبىز «نۇر وتان» پارتياسىنىڭ قولداۋىمەن العاشقى جارنانى ازايتۋ بويىنشا جۇمىستاردى باستاپ كەتتىك. جانە اتالعان شارۋانى قىزۋ دوڭگەلەتىپ، وسى اپتادان باستاپ ءار وڭىرلەردە «7-20-25» سەرتيفيكاتتارىن بەرە باستايمىز»، - دەدى «باسپانا» يپوتەكالىق ۇيىمىنىڭ باسشىسى قايرات التىنبەكوۆ.

«7-20-25» سەرتيفيكاتىنىڭ ورتاشا نومينالى 1 ميلليون تەڭگەنى قۇرايتىن بولادى. دەمەك، جەرگىلىكتى اتقارۋشى ورگاندار تاراپىنان «7-20-25» باعدارلاماسىنا قاتىسۋدى ىنتالاندىرۋ ءۇشىن كەم دەگەندە 50 ميلليارد تەڭگە بولىنبەك.

ەستەرىڭىزدە بولسا، قىركۇيەك ايىندا «7-20-25» باعدارلاماسى اياسىندا العاشقى جارنانى ارزانداتۋ ماقساتىندا «جاس ارمان» مەن «قامقور باسپانا» ونىمدەرى ازىرلەنىپ، ولار وڭىرلەردە ىسكە اسىرىلا باستاعان ەدى. ەندى ونىمدەر بىرىكتىرىلىپ، العاشقى جارنانى ازايتۋ بويىنشا الەۋمەتتىك جۇمىس «7-20-25» سەرتيفيكاتتارى اياسىندا كەڭىنەن جۇرگىزىلمەك.

 

سوڭعى جاڭالىقتار