تۇركىستان تاۋلارىندا 7 قار بارىسى، 178 ءۇندى جايراسى ءجۇر
سونداي-اق، 604 ارقار مەن 155 بۇقار بۇعىسى، 2658 تاۋەشكى بار. بۇل تۋرالى وڭىرلىك كوممۋنيكاتسيالار قىزمەتىندە ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى باسشىسىنىڭ ورىنباسارى باقىتجان قىرىقباي مالىمدەدى، دەپ حابارلايدى قازاقپارات ءتىلشىسى.
باقىتجان قىرىقبايدىڭ ايتۋىنشا، بۇگىندە وڭىردەگى مەملەكەتتىك ورمان قورى 3 ميلليون 439 مىڭ گەكتاردى قۇرايدى. ورمان قورىن مولايتۋ جۇمىستارى ماقساتىندا 7 مىڭ گەكتارعا 43 توننا سەكسەۋىل تۇقىمىن سەبىلىپ، 720,6 گەكتارعا كوشەت ەگىلگەن.
«سەكسەۋىل وتىنىنىڭ تابىس كوزىنە اينالىپ بارا جاتقاندىعىن ەسكەرىپ ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعىمەن 2017 -جىلدىڭ 1 -شىلدەسىنەن سەكسەۋىل سۇرەگىن ساۋدالاۋعا تىيىم سالىندى. زاڭعا باعىنباي قۇقىق بۇزۋشى 12 ازاماتقا قۇزىرلى ورگاندار تاراپىنان اكىمشىلىك ايىپپۇل سالىندى. بۇل جۇمىستار بيىلعى جىلى دا جالعاسۋدا»، - دەدى اۋماقتىق ينسپەكتسيا باسشىسىنىڭ ورىنباسارى.
بۇدان وزگە، وبلىستاعى اڭشىلىق القاپتاردىڭ جالپى اۋماعى 6 ميلليون 744 مىڭ گەكتاردى قۇراپ، ونىڭ 6 ميلليون 552 مىڭ گەكتارى اڭشىلىق پايدالانۋشىعا بەكىتىلگەن. الايدا قولدانىستاعى زاڭنامالارداعى وزگەرىستەرگە سايكەس، پاركتەر اۋماعىندا اۋ اۋلاۋعا 2017 -جىلدان باستاپ تۇپكىلىكتى تىيىم سالىنعان. دەگەنمەن جانۋالار دۇنيەسىن ارتتىرۋ ماقساتىندا بۇگىنگى تاڭدا وبلىستا جەك دۋاداقتى جاساندى جولمەن وسىرۋگە ارنالعان تۇقىمباق اشىلعان. بايدىبەك اۋدانى اۋماعىنداعى 1000 گەگتار اۋماققا قولدان وسىرىلگەن 3995 باس جەك دۋاداق قۇستارى ب ا ءا- دەن اكەلىندى. ونىڭ 2495 باسى قىزىلقۇم مەن مويىنقۇمعا ەركىندىككە جىبەرىلسە، قالعان 1500 باس جەك دۋاداق قۇسى انالىق باستىڭ سانىن ارتتىرۋ ماقساتىندا بايدىبەك اۋدانىندا ورنالاسقان ارنايى تۇقىمباققا ورنالاستىرىلدى.
سونىمەن قاتار، ارنايى جۇرگىزىلگەن تەكسەرۋلەر مەن تابيعات قورعاۋ ءىس-شارالارى ناتيجەسىندە 329 قۇقىقبۇزۋشىلىق انىقتالدى. ونىڭ 223 ى بالىق، 68 ى اڭشىلىق جانە 38 ى ورمان شارۋاشىلىعى، ەرەكشە قورعالاتىن تابيعي اۋماقتار(ە ق ت ا) بويىنشا بولىپ وتىر.