اكتيۆتەردى قايتارۋ: دەكلاراتسيادا جالعان مالىمەت ۇسىنعاندار 6 جىلعا سوتتالۋى مۇمكىن
«زاڭسىز الىنعان اكتيۆتەردى مەملەكەتكە قايتارۋ تۋرالى» زاڭنىڭ ءماجىلىس دەپۋتاتتارىنىڭ باستاماسىمەن جاسالعان جوباسىندا اكتيۆتەردى اشۋ تۋرالى دەكلاراتسيا ينستيتۋتى ەنگىزۋ كوزدەلگەن.
ول ينستيتۋت اتالعان زاڭ سۋبەكتىلەرىنە تيەسىلى اكتيۆتەردىڭ شىعۋ كوزدەرىنىڭ زاڭدىلىعىن انىقتاپ، تەكسەرۋگە نەگىز بولادى.
«مۇنداي دەكلاراتسيالاردى ۇسىنۋ سۋبەكتىلەردىڭ قۇقىعى بولىپ تابىلادى»، - دەپ جازىلعان قۇجاتتىڭ سالىستىرمالى كەستەسىنە بەرىلگەن تۇسىنىكتەمەدە.
وسى قۇقىعىن پايدالانۋ كەزىندە دەكلاراتسيا ارقىلى كورىنەۋ تەرىس مالىمەت بەرگەن تۇلعالار جاۋاپقا تارتىلماق. جازانىڭ ەڭ اۋىر ءتۇرى - 6 جىلعا باس بوستاندىعىنان ايىرۋ.
«تابىس ەتىلگەن مۇلىكتى جاريا ەتۋ تۋرالى دەكلاراتسيادا كورىنەۋ جالعان مالىمەتتەر بەرۋ ارقىلى زاڭسىز الىنعان، ونىڭ ىشىندە الىپ قويىلعان مۇلىكتى مەملەكەت مەنشىگىنە اينالىمنان جاسىرۋ ارەكەتى ءۇشىن مۇلكىن تاركىلەپ، 5 مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا، نە سول مولشەردە تۇزەۋ جۇمىستارىنا، نە التى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى»، - دەلىنگەن ۇسىنىلىپ وتىرعان رەداكسيادا.