جاپون پرەمەر-ءمينيسترىن جەرلەۋ راسىمىنە 6 مىڭنان استام ادام قاتىستى

استانا. قازاقپارات – ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۆەدومستۆو باسشىسى مۇحتار تىلەۋبەردىنىڭ جاپونياعا ساپارىن قورىتىندىلادى، دەپ حابارلايدى قازاقپارات ءتىلشىسى.

«وسى جىلدىڭ 27- قىركۇيەگىندە قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى جاپونيانىڭ بۇرىنعى پرەمەر-ءمينيسترى سيندزو ابەنىڭ مەملەكەتتىك جەرلەۋ راسىمىنە قاتىسۋ ءۇشىن جاپونياعا جۇمىس ساپارىمەن بارىپ قايتتى. رەسمي راسىمگە 6 مىڭنان استام ادام، ونىڭ ىشىندە جاپونيانىڭ جوعارى لاۋازىمدى ساياساتكەرلەرى، پارلامەنت دەپۋتاتتارى جانە 200 دەن استام ەل مەن حالىقارالىق ۇيىمداردىڭ شەتەلدىك دەلەگاتسيالارى قاتىستى. قازاقستاندىق دەلەگاتسيا باسشىسىن جاپونيا پرەمەر-ءمينيسترى فۋميو كيشيدا قابىلدادى. ول پرەزيدەنت قاسىم-جومارت توقايەۆتىڭ، قازاقستان ۇكىمەتى مەن حالقىنىڭ اتىنان كوڭىل ايتتى. قازاقستان س ءى م باسشىسى مارقۇم ەكس-پرەمەر-ءمينيستردىڭ جۇبايى اكيە ابەگە دە كوڭىل ايتتى»، - دەدى ول مينيسترلىكتە وتكەن اپتالىق بريفينگ بارىسىندا.

ونىڭ اتاپ وتۋىنشە، ساپار اياسىندا قازاقستان س ءى م باسشىسى جاپونيانىڭ سىرتقى ىستەر ءمينيسترى ەشيماسا حاياشيمەن ەكىجاقتى كەزدەسۋ وتكىزدى. تاراپتار ەكىجاقتى جانە كوپجاقتى ىنتىماقتاستىقتى دامىتۋدى تالقىلاپ، حالىقارالىق احۋال مەن ساۋدا-ەكونوميكالىق ماسەلەلەر بويىنشا پىكىر الماستى.

«سونىمەن قاتار، «ورتالىق ازيا + جاپونيا» ديالوگىنىڭ سىرتقى ىستەر مينيسترلەرى كەڭەسىنىڭ 9-وتىرىسىن وسى جىلدىڭ جەلتوقسانىندا جانە ەكونوميكالىق ىنتىماقتاستىق جونىندەگى قازاقستان-جاپونيا ۇكىمەتارالىق جانە جەكە سەكتورلار اراسىنداعى بىرلەسكەن كوميسسياسىنىڭ 8-وتىرىسىن 2023-جىلى اقپاندا توكيو قالاسىندا وتكىزۋ جونىندە كەلىسىلدى»، - دەدى ايبەك سمادياروۆ.