الداعى كۇندەرى ەلدىڭ سولتۇستىگىندە قار جاۋىپ، 6 گرادۋسقا دەيىن سۋىتادى

استانا. قازاقپارات - قازگيدرومەت الداعى ءۇش كۇنگە ارنالعان اۋا رايى بولجامىن جاريالادى، دەپ حابارلايدى قازاقپارات.

الداعى تاۋلىكتەردە سولتۇستىك- باتىس سيكلوننىڭ سوڭىنان سۋىق انتيسيكلون كەلەدى. رەسپۋبليكانىڭ سولتۇستىك، ورتالىق جانە شىعىس وڭىرلەرىندە جاڭبىردىڭ سوڭى قارعا ۇلاسادى. كوكتايعاق، تۇمان جانە اۋا تەمپەراتۋراسىنىڭ مينۋسقا دەيىن تومەندەۋى كۇتىلەدى.

جەلدىڭ كۇشەيۋى بولجانادى، ەلىمىزدىڭ وڭتۇستىك- باتىسىندا، وڭتۇستىگىندە شاڭدى داۋىل سوعادى.

ەلىمىزدىڭ سولتۇستىك وڭىرلەرىندە تەرمومەترلەردىڭ تۇنگى كورسەتكىشتەرى 1-6 گرادۋسقا دەيىن تومەندەيدى، ال كۇندىز اۋا تەمپەراتۋراسى 1-6 گرادۋسقا دەيىن ازداپ جوعارىلايدى. ال رەسپۋبليكانىڭ وڭتۇستىك جانە باتىس وڭىرلەرىندە كۇندىز اۋا تەمپەراتۋراسى 15-23 گرادۋسقا دەيىن جىلى بولادى.