شىڭجاڭداعى قازاق قىزى 6 مىڭ شاقىرىم جولدى «تەمىراتپەن» ءجۇرىپ ءوتتى

None
None
نۇر-سۇلتان. قازاقپارات- قىتايداعى قانداسىمىز 22 جاستاعى كاۋسار قيزات قىزى 6 مىڭ شاقىرىم جولدى ۆەلوسيپەدپەن ءجۇرىپ ءوتتى دەپ حابارلايدى، قازاقپارات ءتىلشىسى.

ول 15-مامىر كۇنى قىتايدىڭ شىنجىن قالاسىنان تۋعان جەرى ش ۇ ا ر-دى بەتكە الىپ جولعا شىققان بولاتىن. 28-شىلدە كۇنى ءۇرىمجى قالاسىنا جەتتى. جول ۇزاقتىعى 6 مىڭ شاقىرىمدى قۇرايدى. قانداسىمىز بيىل شىنجىنداعى جوعارعى وقۋ ورنىن بىتىرگەن. ونىڭ ايتۋىنشا، ول بۇل ساپارىن جاستىق شاعىنىڭ ءبىر بەلگىسى رەتىندە قالدىرىعىسى كەلگەن.

«شىنجىننان ۇرىمجىگە ۇشاقپەن دە، پويىزبەن دە قايتۋدىڭ مۇمكىندىگى بار ەدى. الايدا، وسىنداي دەنساۋلىعىم جاقسى، وزىمە تاۋەلدى ۋاقىتىم بار كەزىندە، كوپ نارسەگە باس اۋىرتپايتىن الاڭسىز جاستىق شاعىمدا ەستە قالارلىقتاي ءبىر ەرلىك جاساعىم كەلدى»، - دەيدى كاۋسار قيزات قىزى. سونىمەن بىرگە ول ءوزىنىڭ جولداعى قيىندىقتارىمەن دە ءبولىستى.

«جولداعى مەن ءۇشىن ەڭ قيىن بولعان جەر شيڭليڭ تاۋىنان اسۋ بولدى. 7 ساعات بويى يەن تاۋ جولىندا ءجۇردىم، كۇن جاڭبىرلى، تاۋدىڭ ءۇستى تورلاعان تۇمان، جالعىز وزىمە ەرەكشە قورقىنىشتى بولدى. الايدا، «كاۋسار، قانشاما جولدى باسىپ ءوتتىڭ، بۇعان دا ءتوزۋىڭ كەرەك، اسپايتىن اسۋ جوق، شىقپايتىن شىڭ جوق»، دەپ وزىمە مەدەۋ بەرىپ، ودان دا اسىپ ءوتتىم. وسى ەكى جارىم ايعا جۋىق جولداعى جالعىز ساپارىم مەن ءۇشىن ءومىر بويى ەستە قالارلىقتاي بولدى. وسى ورايدا، قازىرىگى جاستارعا ايتارىم، جالىنداعان جاستىق شاقتارىڭدا ويعا العان ارماندارىڭدى جاساۋعا قۇلشىنىڭىزدار، ومىرلەرىڭىزگە وكىنىش قالدىرماڭىزدار!» - دەيدى قازاق قىزى.


اۆتور ريزابەك نۇسىپبەك ۇلى


سوڭعى جاڭالىقتار