باس پروكۋراتۋراعا رەفەرەندۋم بويىنشا 6 ادام شاعىمدانعان
جالپى حالىقتىق رەفەرەندۋم بارىسىن باياندايتىن مارافوندا باس پروكۋراتۋرا وكىلى ازامات سەرعازين ساياسي ناۋقانعا دايىندىق پەن داۋىس بەرۋ تىنىش جاعدايدا وتكەنىن ايتتى.
«وسى ساتتە داۋىس بەرۋ ناتيجەسىنە اسەر ەتەتىن قۇقىق بۇزۋ فاكتىلەرى بولعان جوق. الەۋمەتتىك جەلىلەردە رەفەرەندۋم ۋچاسكەلەرىندە داۋىس بەرۋ تۋرالى ءارتۇرلى حابارلامالار تاراپ جاتىر. تەكسەرۋ كەزىندە ولاردىڭ كوبى راستالمادى. ءالى دە تەكسەرۋ ءجۇرىپ جاتىر. بۇگىن پروكۋراتۋرا ورگاندارىنا ازاماتتاردان 6 ءوتىنىش كەلىپ ءتۇستى. ونىڭ بىرەۋى - باس پروكۋراتۋراعا، ەكى- ەكىدەن – ش ق و مەن ب ق و پروكۋراتۋراسىنا، بىرەۋى - اقتوبە وبلىستىق پروكۋراتۋراسىنا باعىتتالدى»، - دەگەن مارافون بارىسىندا ازامات سەرعازين.
ەسكە سالا كەتەيىك، تۋرا كەشكى 21.00-دە ەلىمىزدىڭ بۇكىل وڭىرىندە رەفەرەندۋم ۋچاسكەلەرىندە داۋىس بەرۋ اياقتالدى. بۇعان دەيىن ەلىمىزدىڭ 12 وڭىرىندەگى 8089 جانە 10 شەت مەملەكەتتەگى قازاقستان ەلشىلىكتەرى جانىنان اشىلعان 12 رەفەرەندۋم ۋچاسكەسىندە جۇمىس اياقتالىپ، كوميسسيا مۇشەلەرى داۋىس ساناۋعا كىرىسكەن بولاتىن. ءبىر ساعاتتان سوڭ اقتوبە، اتىراۋ، باتىس قازاقستان، ماڭعىستاۋ جانە قىزىلوردا وبلىستارىنداعى 1858 ۋچاسكەدە دە ءوڭىر تۇرعىندارى داۋىس بەرىپ بولدى. سونىمەن قاتار شەت ەلدەردەگى 5 ۋچاسكە دە جۇمىسىن توقتاتتى.
اۆتور: مارلان جيەمباي