بيىل ىشكى تۋريستەردىڭ سانى 6 ميلليوننان اسىپ تۇسپەك
بۇل تۋرالى «Kazakh Tourism» ا ق ۇلتتىق كومپانياسىنىڭ باسقارۋشى ديرەكتورى دانيەل سەرجان ۇلى ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدە تۋريستىك ماۋسىم ەندى باستالادى. بيىلعى ءبىزدىڭ بولجام بويىنشا 6 ميلليوننان استام وتاندىق تۋريست ەل ىشىندە ساياحاتتاپ، دەمالادى دەپ وتىرمىز. كورسەتكىشتىڭ ودان اسىپ ءتۇسۋى ابدەن مۇمكىن. بىزگە ىشكى تۋريستەردىڭ لەگى بەلگىلى، ەندىگى ماقسات - ساپانى ارتتىرۋ. ياعني تۋريستەرگە جاعداي جاساپ، ولارعا ساپالى قىزمەت كورسەتۋ. سونىمەن قاتار جۇيەلى، ۇيىمداسقان تۋريزمدى ىلگەرىلەتۋ دە ماڭىزدى. ودان بولەك، سىرتتان كەلەتىن تۋريستەر بار. جالپى قازاقستانعا شەتەلدىك تۋريستەردىڭ دەنى رەسەي جانە ت م د ەلدەرىنەن كەلەدى»، - دەدى دانيەل سەرجان ۇلى.
«Kazakh Tourism» ا ق باسقارۋشى ديرەكتورىنىڭ مالىمەتىنشە، وتاندىق ءتۋريزمدى ىلگەرىلەتۋدە اراب ەلدەرىنەن تۋريستەردى تارتۋعا دەن قويىلىپ جاتىر.
«قازىرگى ۋاقىتتا بىلتىرمەن سالىستىرعاندا رەسەيدەن كەلەتىن تۋريستەردىڭ سانى 7 ەسەگە ارتتى. بۇل كورسەتكىش الداعى ۋاقىتتا ارتا تۇسپەك. سەبەبى وسى كۇندەرى ومبى، نوۆوسىبىر، ەكاتەرينبۋرگ، سانكت-پەتەربۋرگ جانە ماسكەۋدە قازاقستان تۋريزمىنىڭ تانىستىرىلىمى ءوتىپ جاتىر. قازىردىڭ وزىندە كورشى ەلدەن شوپ-تۋرمەن كەلىپ جاتقاندار بارشىلىق»، - دەيدى ول.