كوروناۆيرۋستان اتىراۋ وبلىسىندا ءبىر كۇندە 6 ادام قايتىس بولدى
وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنە سۇيەنسەك، وتكەن تاۋلىكتە 39 ادام Covid-19 ينفەكسياسىن جۇقتىرعان. اسىرەسە، اتىراۋ قالاسى قاۋىپتى ۆيرۋستىڭ ەڭ كوپ تارالاتىن وشاعى بولىپ وتىر.
شاھاردا 29، جىلىوي اۋدانىنداعى تەڭىز كەن ورنىندا 3 ناۋقاس انىقتالعان. سونداي-اق، قىزىلقوعا اۋدانىندا - 2، ماحامبەتتە - 2، جىلىويدا - 1، يساتايدا - 1، قۇرمانعازى اۋدانىندا 1 ادامنان كوروناۆيرۋس ينفەكسياسىنىڭ بەلگىسى تابىلعان.
«وتكەن تاۋلىكتە قاۋىپتى ۆيرۋس جۇقتىرعان 6 ادام قايتىس بولدى. ال، 14 ادام ەمدەلىپ شىقتى. قازىر 364 ادام ءۇي جاعدايىندا ەمدەلۋ ءۇشىن وقشاۋلاندى. ينفەكسيالىق ستاتسيونارلاردا 226 ناۋقاس ەم قابىلداپ جاتىر. ونىڭ ىشىندە مودۋلدىك اۋرۋحانادا - 80، 2№ وبلىستىق اۋرۋحانادا - 50، اۋداندارداعى ينفەكسيالىق ستاتسيونارلاردا - 35، تەڭىز كەن ورنىنداعى ستاتسيوناردا 61 پاتسيەنت ەم-دوم شاراسىن قابىلداپ جاتىر»- دەپ حابارلادى باسقارمانىڭ باسپا ءسوز قىزمەتى.
ەسكە سالا كەتەلىك، بۇعان دەيىن اتىراۋ وبلىسى «جاسىل» ايماققا وتكەنىن جازعان ەدىك.