عالىمدار مامونتتاردى 6 جىلدان كەيىن قايتا ءتىرىلتۋدى جوسپارلاپ وتىر

نۇر-سۇلتان. قازاقپارات - بيولوگيا مەن گەنەتيكا سالاسىندا قۇرىلعان جاڭا كومپانيا Colossal جويىلىپ كەتكەن كەيبىر تىرشىلىك يەلەرىن ءتىرىلتۋ باستاماسىن كوتەردى.

ولار جوباسىن مامونتتاردى ءتىرىلتۋ ارقىلى ىسكە اسىرۋدى جوسپارلاپ وتىر.

بۇل تۋرالى CNBC حابارلادى.

مامونتتاردى قالپىنا كەلتىرۋ يدەياسى 10 جىلدان استام ۋاقىت تالقىلانىپ كەلەدى. 13- قىركۇيەكتە كومپانيا باستى ماقساتىن جۇزەگە اسىرۋعا مۇمكىندىك بەرەتىن قوسىمشا قارجىلىق قولداۋ العانىن حابارلادى. كومپانيا بۇل جوباسىنا 15 ميلليون دوللار جيناعان.

كومپانيا عالىمدارى مامونتتاردى قالپىنا كەلتىرۋ اركتيكانى قۇتقارۋعا، دەگراداتسيالانعان ەكوجۇيەنى قالپىنا كەلتىرۋگە جانە كليماتتىڭ وزگەرۋىن باياۋلاتۋعا كومەكتەسەدى دەيدى.

ماماندار 6 جىلدان كەيىن تابيعاتتا العاشقى مامونت پايدا بولادى دەپ سەندىردى.

بۇل جوباعا ءىرى كاسىپكەر بەن لەمم جانە اتاقتى گەنەتيك - مولەكۋليارلىق ينجەنەر، گارۆارد مەديتسينالىق مەكتەبىنىڭ پروفەسسورى دجوردج چەرچ جەتەكشىلىك ەتەدى. بۇعان دەيىن چەرچ توبى مامونت گەندەرىن ازيالىق ءپىلدىڭ تەرى جاسۋشالارىنىڭ د ن ق- مەن بىرىكتىرۋدى تاجىريبەدەن وتكىزگەن بولاتىن.

ال ازيالىق ءپىل مامونتقا ۇقساستىعىنىڭ ارقاسىندا وسىندا ءبىراز جەتىستىككە جەتكەن. كومپانيا بۇل زەرتتەۋلەردى جالعاستىرىپ، زەرتحانالىق جاعدايدا ءپىل مەن مامونت گيبريدىن الۋدى جوسپارلاپ وتىر.

جوبا ازيا پىلدەرىن اركتيكانىڭ ۇلكەن اۋماقتارىندا ءومىر سۇرۋگە مۇمكىندىك بەرۋ ارقىلى ساقتاپ قالۋعا باعىتتالعان.

چەرچ ازيا ءپىلىنىڭ جويىلۋ الدىندا تۇرعانىن ايتادى.

«ونىڭ ەكى ءتۇرلى قاۋپى بار. ءبىرىنشىسى - گەرپەس ۆيرۋسى، ەكىنشىسى - ونىڭ ادامدارعا جاقىندىعى. سوندىقتان ءبىز وسى ەكى جاعدايدى تۇزەتىپ، بۇل تۇرگە جاڭا تىرشىلىك ورتاسىن بەرۋدى شەشتىك. ۇلكەن جەرلەر بار. مىسالى، كانادا، الياسكا مەن ءسىبىردىڭ سولتۇستىك ايماقتارىندا مامونتتار ءومىر سۇرە الادى»، - دەدى پروفەسسور.

گەنەتيكالىق تۇرلەندىرىلگەن ازيالىق پىلگە گەرپەس ۆيرۋسىمەن كۇرەسۋ جانە تومەن تەمپەراتۋراعا توتەپ بەرۋ قابىلەتى بەرىلگەن.

massaget.kz