تالدىكول ماڭىنداعى 6 مىڭ گەكتارعا جۋىق جەر اباتتاندىرىلادى
بۇل تۋرالى نۇر-سۇلتان قالاسى ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحايەۆ ءمالىم ەتتى، دەپ حابارلايدى قازاقپارات ءتىلشىسى.
«سوڭعى 2 جىل بويى تۇرعىنداردان «تالدىكول بولعان با جانە ول تاريحي كول مە؟» دەپ سۇراۋمەن كەلەمىن. جاۋاپ ءارتۇرلى. ودان بولەك، مەندە 1976-جىلى عارىشتان تۇسىرىلگەن سۋرەت بار، وندا تالدىكول انىق كورىنگەن، ءبىراق ونىڭ جانىندا ەشتەڭە جوق. ياعني كىشى تالدىكول دەگەن كول جوق، ول - جاي عانا سۋلى-باتپاق. سوندىقتان دا كىشى تالدىكولدى كول دەپ ايتۋعا بولمايدى»، - دەدى نۇرلان ۇرانحايەۆ ەلوردا اكىمدىگىندە وتكەن باسپا ءسوز ءماسليحاتىندا.
سونداي-اق، باسقارما باسشىسى تالدىكولدىڭ ماڭىندا قۇرىلىس جۇمىسى باستالىپ، كول ماڭى اباتتاندىرىلاتىنىن ايتتى.
«كىشى تالدىكول اڭگىمەسى 2 جىلدان بەرى سوزىلىپ كەلەدى. ول - كول ەمەس، كەرىسىنشە زياندى، قالدىق سۋ-باتپاق، ونىڭ سالدارىنان جەر ەكولوگيالىق ەروزياعا ۇشىرىپ جاتىر. ءبىزدىڭ بار كولدى جويۋ ويىمىز جوق. كەرىسىنشە باتپاقتى سۋدى تازارتىپ، ادام يگىلىگىنە جاراتپاقپىز. ال تالدىكولدىڭ وزىندە 5700 گ ا جەر اباتتاندىرىلادى. سونداي-اق، ەكولوگتارعا ارنالعان ورىن اشۋ جوسپارى دا بار. جانە ءۇي باتپاقتى سۋدىڭ ۇستىنە ەمەس، تالدىكولدىڭ بويىنا سالىنادى»، - دەيدى ول.
بۇعان دەيىن نۇرلان ۇرانحايەۆ تالدىكولدىڭ فلوراسى مەن فاۋناسى تۋرالى ايتقان ەدى. ونىڭ ايتۋىنشا، اتالعان كولدە ەلىمىزدىڭ قىزىل كىتابىنا ەنگەن 200 شاماسىندا قۇس جانە 90 وسىمدىك ءتۇرى بار.