12:16, 21 - قاراشا 2020 | GMT +6
ەسىرتكى جارنامالاعان قوستانايلىق 6 جىلعا سوتتالۋى مۇمكىن
قوستاناي. قازاقپارات - رۋدنىي قالاسىنىڭ پوليتسەيلەرى ەسىرتكىنى جارنامالاعان جەرگىلىكتى تۇرعىندى ۇستادى، دەپ حابارلايدى قازاقپارات وبلىستىق پوليتسيا دەپارتامەنتى باسپا ءسوز قىزمەتىنە سىلتەمە جاساپ.
رۋدنىي قالاسىنىڭ اۋماعىندا «دارمەك» جەدەل الدىن الۋ ءىس-شاراسىن جۇرگىزۋ بارىسىندا پوليتسيا قىزمەتكەرلەرى ءۇي قابىرعالارىنا ەسىرتكى جارناماسىن جازعان تۇرعىندى قولعا ءتۇسىردى.
«جەدەل ۋاكىلدەر 22 جاستاعى جەرگىلىكتى ازاماتتى ۇستادى. ەر ادام ۇيلەردىڭ قابىرعالارىنا ينتەرنەت-سايتتاردىڭ سىلتەمەلەرىن جازعان. اتالعان فاكت قىلمىستىق كودەكستىڭ 299-بابىندا كوزدەلگەن «ەسىرتكى قۇرالدارىن، پسيحوتروپتىق زاتتاردى نەمەسە سول تەكتەستەردى، پرەكۋرسورلاردى ناسيحاتتاۋ نەمەسە زاڭسىز جارنامالاۋ» قىلمىستىق قۇقىق بۇزۋشىلىق بەلگىلەرى بويىنشا تىركەلدى. باپتىڭ سانكتسياسى التى جىلعا دەيىنگى مەرزىمگە باس بوستاندىعىنان ايىرۋدى كوزدەيدى»، دەلىنگەن ۆەدومستۆو حابارلاماسىندا.
رەسپۋبليكالىق جەدەل الدىن الۋ ءىس-شاراسى ءالى دە جالعاسادى.