بىرىككەن اراب امىرلىكتەرىندە جازاسىن وتەپ جاتقان 6 قازاقستاندىق ەلگە قايتارىلۋى مۇمكىن

نۇر- سۇلتان. قازاقپارات - پارلامەنت سەناتىندا قازاقستان مەن بىرىككەن اراب امىرلىكتەرى اراسىندا سوتتالعان ادامداردى بەرۋ شارتىن راتيفيكاتسيالاۋ تۋرالى زاڭ جوباسى قارالدى، دەپ حابارلايدى قازاقپارات ءتىلشىسى.

«وسى شارتپەن ەكى ەلدىڭ اراسىنداعى تولىق كەلىسىمدەر جيناعى جاسالىپ وتىر. ءقازىر ەكى ەلدىڭ ءوزارا قارىم- قاتىناسى جاقسى. ارامىزدا ۆيزا جوق. ساۋدا، تۋريزم، ينۆەستيتسيا تارتۋ ارتىپ كەلەدى. جىل سايىن كوشى- قون سانى ءوسىپ جاتىر»، - دەدى سەنات وتىرىسىندا زاڭ جوباسىن وقىعان باس پروكۋروردىڭ ورىنباسارى مارات احمەتجانوۆ.

ونىڭ ايتۋىنشا، بىرىككەن اراب امىرلىكتەرىندەگى جەكەلەگەن قىلمىس تۇرلەرى قازاقستان زاڭدارىندا جوق.

«مىسالى ولاردىڭ ورازا بۇزۋ، قوعامدىق جەردە ىشىمدىك ءىشۋ، نەكەسىز جىنىستىق قاتىناسقا ءتۇسۋ قىلمىس بولىپ سانالادى. ءبىراق ەكى ەلدىڭ زاڭى بويىنشا نەگىزگى قىلمىس پەن جازا تۇرلەرى ۇقساس. جالپى ءبىز باسقا ەلدە قىلمىستىق جاۋاپكەرشىلىككە تارتىلعان ازاماتتارعا قول سوزۋىمىز كەرەك. سەبەبى مەملەكەت ءۇشىن شەتەلدەگى ازاماتتاردى قورعاۋ - كونستيتۋتسيا جۇكتەگەن مىندەت. سوندىقتان قىلمىس جاسادى دەپ ايىپتالعان ازاماتتاردان باس تارتپايمىز»، - دەدى ول.

مارات احمەتجانوۆ بۇل شارتتىڭ ماقساتى - سوتتالعانداردى جازاسىن ەلىندە وتەۋگە جاعداي جاساۋ ەكەنىن ايتىپ ءوتتى.

«قۇجاتتى سوتتالعان ادامدى بەرۋ مەن ودان باس تارتۋ جاعدايلارى ناقتى كورسەتىلگەن. قازىرگى ۋاقىتتا ءبىزدىڭ التى قازاقستاندىق بىرىككەن اراب امىرلىكتەرىندە جازاسىن وتەپ جاتىر. شارت كۇشىنە ەنگگەن سوڭ ونى ەلگە قايتارۋعا مۇمكىندىك تۋادى. قازاقستاندا سوتتالعان ب ا ءا ازاماتتارى جوق»، - دەدى ول.