قازاقپارات كۇنتىزبەسى: 6- تامىز
اتاۋلى كۇندەر
يادرولىق قارۋعا تىيىم سالۋ ءۇشىن كۇرەستىڭ بۇكىل الەمدىك كۇنى (حيروسيما كۇنى)
1945-جىلى تامىزدىڭ 6 سىندا ا ق ش ۇشقىشى توماس فەرەبي باسقارعان «ەنولا گەي» اتتى ب-29 اسكەري ۇشاق جاپونيانىڭ حيروسيما قالاسىنا الەمدەگى ەڭ ءبىرىنشى اتوم بومباسىن تاستادى. بومبا تاستاۋ ءۇشىن حيروسيمانى ارنايى تاڭداپ الۋى قالانىڭ گەوگرافيالىق ورنالاسۋى، ءۇش جاعىنان تاۋ قورشاپ تۇراتىندىعى سەبەپ بولعان.
حالىقارالىق «دارىگەرلەر بەيبىتشىلىك ءۇشىن» كۇنى
حيروسيماعا بومبا تاستالعان كۇننەن باستاپ، «الەم دارىگەرلەرى يادرولىق سوعىسقا قارسى» حالىقارالىق قوزعالىسى اتقارۋ كوميتەتىنىڭ شەشىمى بويىنشا اتالىپ وتىلەدى.
ەستە قالار وقيعالار
2003 -جىلى جامبىل وبلىسىنىڭ قاراتاۋ قالاسىندا فوسفور سالاسىنىڭ كەنشىلەرىنە ارنالعان ەسكەرتكىش سالتاناتتى تۇردە اشىلدى.
1937 -جىلعى ءبىرىنشى گەولوگيالىق بارلاۋ ەكسپەديتسياسى كەزىندە قاراتاۋ فوسفوريت الابىنىڭ كولەمى، ساپاسى جانە سيپاتى انىقتالدى، ال 1941-جىلى ولاردى ونەركاسىپتىك يگەرۋ باستالدى. بۇل جەردە باستاپقىسىندا شولاقتاۋ كەنتى پايدا بولعان، كەن-حيميا كومبيناتى سالىندى، ينفراقۇرىلىم سالاسى دامىدى، حالىقتىڭ سانى ءوستى.
كەيىننەن، 1963-جىلى اۋىلعا قالا دارەجەسىن بەرۋ تۋرالى شەشىم قابىلداندى. بۇگىنگى قاراتاۋ «قازفوسفات» ج ش س- نىڭ بولىمشەسى بولىپ تابىلاتىن كەن-حيميا كومبيناتىنىڭ ىسكە قوسىلۋىنىڭ ارقاسىندا ۇزاق جىلدارداعى توقىراۋدان كەيىن قايتادان جاڭعىرىپ كەلەدى.
2012 -جىلى لوندوندا 30-جازعى وليمپيادا ويىندارىندا جەڭىل اتلەتيكا جارىسىندا ايەلدەر اراسىندا ءۇش قارعىپ سەكىرۋدەن قازاقستاندىق سپورتشى ولگا رىپاكوۆا ۇزدىك ونەر كورسەتىپ، التىن مەدال جەڭىپ الدى.
2014 -جىلى بەلگىلى ارحەولوگ، تاريح عىلىمدارىنىڭ دوكتورى زەينوللا ساماشيەۆتىڭ جەتەكشىلىگىمەن جۇرگىزىلگەن التايداعى ارحەولوگيالىق قازبا جۇمىستارى بارىسىندا شامامەن VII عاسىردا ءومىر سۇرگەن 40 جاستاعى ساربازدىڭ سۇيەگى تابىلدى.
جاۋىنگەردىڭ دەنەسىنىڭ قاسىنان VII عاسىرعا تيەسىلى قارۋ-جاراعى اتاپ ايتقاندا، دۋلىعا، ساداق، جەبە، قورامساق، قىلىش سونىمەن قاتار، اتتىڭ سۇيەكتەرى مەن التىن جالاتىلعان ەر-تۇرمان، جۇگەن تابىلدى.
سونداي-اق، ساربازدىڭ قاسىنا قوبىزعا ۇقساس مۋزىكالىق اسپاپتىڭ قويىلۋى ارحەولوگيالىق قازبا جۇمىسىنىڭ باستى جاڭالىعى بولىپ وتىر. ەسكەرتكىش تۇركى اكادەمياسىنىڭ «باتىس تۇرىك قاعاناتىنىڭ مەملەكەتتىك قۇرىلىمى» اتتى عىلىمي-زەرتتەۋ جوباسى نەگىزىندە قازىلعان.
2014 -جىلى اقوردادا وتكەن ۇكىمەتتىڭ كەڭەيتىلگەن وتىرىسىندا ق ر پرەزيدەنتى نۇرسۇلتان نازاربايەۆ مينيسترلەر كابينەتىنىڭ قايتا قۇرىلاتىندىعىن جاريا ەتتى. ۇكىمەتتىڭ جاڭا قۇرىلىمى - 12 مينيسترلىك پەن 30 كوميتەت. ال بارلىق 9 اگەنتتىك جويىلىپ، كوميتەت تۇرىندە مينيسترلىك قاراماعىنا كىردى.
2014 -جىلى قازاقستان رەسپۋبليكاسىنىڭ سينگاپۋر مەن اۋسترالياداعى ەلشىسى قىزمەتىن قوسا اتقارۋشى ەرلان باۋداربەك- قوجاتايەۆ جانە اۋستراليا پارلامەنتى وكىلدەر پالاتاسىنىڭ سپيكەرى برونۆين بيشوپ ۆيكتوريا شتاتىنىڭ مەلبۋرن قالاسىندا (اۋستراليا) قازاقستاننىڭ قۇرمەتتى كونسۋلدىعىن رەسمي تۇردە اشتى.
قۇرمەتتى كونسۋل پاتەنتى اۋستراليانىڭ قازاقستاندىق قوعامداستىعىنىڭ نەگىزىن قالاۋشى جانە قازاقستان-اۋستراليا ساۋدا-ونەركاسىپ پالاتاسىنىڭ پرەزيدەنتى، اۋستراليالىق كاسىپكەر ەندريۋ فەرنيحوعا تابىستالدى.
2018 -جىلى وسكەمەندە تارباعاتاي اۋدانىنىڭ ەلەكە سازى جايلاۋىندا جۇرگىزىلگەن ارحەولوگيالىق زەرتتەۋلەردىڭ العاشقى ناتيجەلەرى جاريالاندى. ول - شىعىس قازاقستان جەرىنەن تابىلعان بەسىنشى «التىن ادام».
بارلىق التىن بۇيىمدار سول كۇيىندە ساقتالعان. ول ءبىزدىڭ زامانىمىزعا دەيىنگى VIII عاسىرعا جاتاتىن ەرتە ساق ءداۋىرىنىڭ مۇراسى.
ەسىك قورعانىنان تابىلعان «التىن ادامنان» دا كونە. ەكەۋىنىڭ اراسىندا 3 عاسىر ايىرماشىلىق بار. وسىلايشا اراعا 50 جىل سالىپ قازاق دالاسىنان ەكىنشى رەت تونالماعان «التىن ادام» تابىلدى.
2018 -جىلى شاحماتتان قازاقستاننىڭ ەرلەر جانە ايەلدەر قۇرامالارى ازيا ۇلتتار كۋبوگىندا 12 مەدال ەنشىلەدى. يراننىڭ حامادان قالاسىندا وتكەن دودادا ءبىزدىڭ شاحماتشىلار 2 التىن، 2 كۇمىس جانە 8 قولا مەدال الدى. التىن مەدال يەگەرلەرى - رينات جۇمابايەۆ پەن گۇلىسحان ناحبايەۆا.