شىمكەنتتە پنيەۆمونيامەن اۋرۋحاناعا 6 مىڭ ادام جاتقىزىلعان
بۇل تۋرالى بۇگىن قالا اكىمى مۇرات ايتەنوۆ شاھارداعى ەپيدەميولوگيالىق جاعداي بويىنشا وتكىزگەن بريفينگتە مالىمدەدى، دەپ حابارلايدى قازاقپارات ءتىلشىسى.
قالا اكىمىنىڭ سوزىنشە، 7 شىلدەدەگى جاعداي بويىنشا، وڭىردە قاۋىپتى ىندەتتەن 18 ادام قايتىس بولعان. قالالىق جۇقپالى اۋرۋحانالارداعى توسەك- ورنى 160 تان 650 گە جەتكىزىلدى. ال، پروۆيزورلىق ستاتسيونارلارداعى ورىن سانى 3010 بولىپ وتىر. قالادا سونداي- اق، پنيەۆمونيامەن تىركەلگەن ناۋقاستار سانى دا وسكەن. كۇنى بۇگىنگە دەيىن 6340 ناۋقاس سىرقاتتانعان بولسا، ونىڭ ىشىندە 6060 ادام (%95,6) اۋرۋحاناعا جاتقىزىلعان. ولاردىڭ اراسىندا 3639 ادام (%60) ەمدەلىپ شىققان. جرۆي- مەن 11891 ادام اۋىرىپ، 535 ادام (%4,5) اۋرۋحاناعا جاتقىزىلعان.
«جەدەل جاردەم قىزمەتىنە 1 ماۋسىمنان 6 شىلدەگە دەيىن شاقىرتۋلار سانى ەكى ەسەگە ءوسىپ، 59925 جەتكەن. Call ورتالىعى (109, 1430) ىسكە قوسىلدى. كوروناۆيرۋسكە ارنالعان توسەك- ورىندار 300 دەن 650 گە كوبەيدى. 26 جەردەن 3110 توسەك- ورىندىق پروۆيزورلىق ستاتسيونار اشىلدى. اۋىر دارەجەدەگى ناۋقاستارعا 136 جانساقتاۋ توسەك ورنى دايىندالىپ، بۇگىندە 95 پايىزعا تولعان. العاشقى مەديتسينالىق كومەك كورسەتۋ ۇيىمدارىنىڭ بازاسىندا قوسىمشا 628 توسەك- ورنى اشىلىپ، جەڭىلاتلەتيكالىق سپورت كەشەنىنىڭ بازاسىندا 360 توسەك- ورىن ۇيىمداستىرىلدى. جەرگىلىكتى وندىرۋشىلەر 5 ميلليوننان استام كوپ قولدانىلاتىن ماسكا مەن 100 توننا دەزينفەكتسيالىق زات، 170 مىڭ فلاكون جانە 192 مىڭ ليتر سپرەي شىعاردى»، - دەدى مۇرات ايتەنوۆ.
شاھار باسشىسىنىڭ ايتۋىنشا، قالادا 56 ءموبيلدى توپ قۇرىلعان. بۇل توپ مۇشەلەرى 10341 ناۋقاسقا قىزمەت كورسەتىپ، 26380 ادام الو ءموبيلدى توبىنىڭ قىزمەتى بويىنشا ءدارى- دارمەكپەن قامتىلعان.
«قالادا 10 ءىرى كوتەرمە ءدارى- دارمەك جانە مەديتسينالىق قۇرال- جابدىق جەتكىزىپ بەرۋشى مەكەمە مەن 560 ءدارىحانا جۇمىس اتقارادى. باعانى باقىلاۋ مەن الىپساتارلىقتىڭ الدىن الۋ ماقساتىندا 4 مونيتورينگتىك توپ قۇرىلدى. ەمدەۋ ورىندارىندا 323 جاساندى تىنىس الۋ (يۆل) اپپاراتى بار. 6 اۋرۋحانادا ارنايى كيسلورود ستانتسيالارى ورناتىلۋدا. مەديتسينا قىزمەتكەرلەرىن قولداۋ ماقساتىندا 2764 ادامنىڭ ەڭبەك اقىلارىنا 780 ميلليون تەڭگە ۇستەمەاقى تولەندى. حالىق قورى جانە دەمەۋشىلەر ەسەبىنەن 935 مەديتسينا قىزمەتكەرىنە 42,4 ميلليون تەڭگەگە ماتەريالدىق كومەك كورسەتىلدى. جۇقپالى اۋرۋلار اۋرۋحاناسىنىڭ ناۋقاستارمەن تىعىز بايلانىستاعى 336 قىزمەتكەرىنىڭ قوناق ۇيلەردە تۇرۋ، تاماق بەرۋ، جۇمىسقا قاتىناۋى ۇيىمداستىرىلدى»، - دەدى مۇرات ايتەنوۆ.