الماتى وبلىسىنان 6 سپورتشى توكيو وليمپياداسىندا ەل نامىسىن قورعايدى

None
None
تالدىقورعان. قازاقپارات - الماتى وبلىسىنىڭ 6 سپورتشىسى بيىل جازدا جاپونيا استاناسى توكيودا وتەتىن وليمپيادا ويىندارىندا ەل نامىسىن قورعايدى.

4 سپورتشى ساداق اتۋدان جولداما جەڭىپ السا، ءبىر سپورتشى گرەك-ريم كۇرەسىنەن جانە ءبىر سپورتشى جەڭىل اتلەتيكا بويىنشا ونەر كورسەتەدى، دەپ حابارلايدى قازاقپارات ءتىلشىسى.

الداعى توكيو وليمپياداسىنا وبلىس سپورتشىلارى 6 ليتسەنزيا ۇتىپ الدى. ولار - ساداق اتۋدان سانجار مۇسايەۆ، دەنيس گانكين، يلفات ابدۋللين، جەڭىل اتلەتيكادان ايمان راتوۆا، گرەك-ريم كۇرەسىنەن اسحات دىلمۇحامەدوۆ. سونىمەن قاتار ساداق اتۋ بويىنشا ءبىر كوماندالىق جولداما وبلىس قورجىنىندا.

كەشە تالدىقورعاندا الماتى وبلىسىنىڭ سپورت سالاسىنداعى وتكەن جىلعى جەتىستىكتەرى قورىتىندىلانىپ، ۇزدىكتەر ماراپاتتالدى.

ءوڭىر باسشىسى ماراپاتتاعاندار قاتارىندا جەڭىل اتلەت ايمان راتوۆا دا بار. سپورتتىق جۇرۋدەن ەل نامىسىن قورعايتىن اتلەت 2012-جىلعى لوندون وليمپياداسىنان كەيىن تۇرمىسقا شىعىپ، بەس جىل ۇلكەن سپورتتان قول ءۇزىپ قالعان. ەكى بالانىڭ اناسى سپورتقا قايتا ورالعانىنا قۋانىشتى ەكەنىن جاسىرمايدى. ول جۋىردا تۇركيانىڭ انتاليا قالاسىندا وتكەن حالىقارالىق جارىستا جۇلدەلى ءۇشىنشى ورىندى يەلەنىپ، وليمپيادا ليتسەنزياسىن جەڭىپ الدى.

«ەڭ الدىمەن قازاق ەلىنىڭ ءۇمىتىن اقتاۋعا تىرىسامىن. ول ءۇشىن كوپ ەڭبەك ەتتىك. كوپ تەر توكتىك. ءالى دە ەڭبەك ەتۋ كەرەك. ماقساتىما جەتەمىن دەگەن ۇمىتتەمىن»، - دەيدى سپورتشى.

ايتا كەتەيىك، وتكەن جىلى جەتىسۋلىق سپورتشىلار 2537 مەدال جەڭىپ العان، سونىڭ 906 سى - التىن، 709 ى - كۇمىس، 922 ءسى قولا بولدى.

جىل سايىن جەرگىلىكتى بيۋجەتتەن 108 ۇزدىك سپورتشىعا اي سايىنعى ستيپەنديا تولەنىپ وتىرادى. سونىڭ ىشىندە 28 سپورتشى - مۇمكىندىگى شەكتەۋلى جاندار.


سوڭعى جاڭالىقتار