قازاقستاندا 6 مىڭ قانداستىڭ ورالمان مارتەبەسى ۇزارتىلدى

None
None
نۇر-سۇلتان. قازاقپارات - قازاقستاندا 6 مىڭ قانداستىڭ ورالمان مارتەبەسى ۇزارتىلدى. بۇل تۋرالى ىشكى ىستەر مينيسترلىگىنىڭ كوشى-قون پوليتسياسى باسقارماسىنىڭ باستىعى عاني شىمىربايەۆ ءمالىم ەتتى، دەپ حابارلايدى قازاقپارات ءتىلشىسى.

«قانداستاردىڭ قازىرگى ۋاقىتتا بەتپە-بەت كەلىپ وتىرعان پروبلەمالارىنا توقتالىپ وتەيىن. قازىرگى تاڭدا ورالماندار جەرگىلىكتى اتقارۋشى ورگاندار ارقىلى ورالمان كۋالىگىن الىپ، تۇراقتى تۇرۋ ىقتيارحاتىن الادى. ودان كەيىن ءبىر جىل كولەمى ىشىندە ازاماتتىقتى الماي، ورالمان كۋالىگىنىڭ مەرزىمى ءوتىپ كەتەدى. سول سەبەپتەن، وسى پروبلەمالىق ماسەلەلەردى شەشۋ ءۇشىن ءى ءى م باستاماسىمەن بىرنەشە رەت ق ر پرەزيدەنت اكىمشىلىگىنە حات جولدانعان بولاتىن. وسىدان كەيىن ورالمان كۋالىگىنىڭ مەرزىمى وتكەن، ورالمان مارتەبەسىن ۇزارتۋ جانە جەڭىلدەتىلگەن تارتىپتە ق ر ازاماتتىعىن بەرۋ جونىندە جۇمىستاردى جۇرگىزۋ تاپسىرىلدى. اتالمىش جۇمىس 2019-جىلدىڭ 31- جەلتوقسانىنا دەيىن سوزىلادى»، - دەدى عاني شىمىربايەۆ ەلوردادا «شەتەلدەگى وتانداستاردى مەملەكەتتىك قولداۋ تۋرالى» ق ر زاڭ جوباسىن تالقىلاۋ بارىسىندا.

كوشى-قون پوليتسياسى باسقارماسىنىڭ باستىعى بۇگىنگى تاڭدا وسى تاپسىرمانىڭ ورىندالىپ جاتقانىن اتاپ ءوتتى. ياعني، ەلىمىزدىڭ اۋماقتارىنداعى بارلىق ەتنيكالىق قازاقتارعا مەرزىمى قاي كەزدە وتكەنىنە قاراماستان ورالمان مارتەبەسىن ۇزارتۋ بويىنشا ءبىر رەتتىك رەسپۋبليكالىق اكتسيا جۇرگىزىلۋدە.

«بۇگىنگى كۇنى جەرگىلىكتى اتقارۋشى ورگاندار ارقىلى ورالمان مارتەبەسى 5988 ەتنيكالىق قازاققا ۇزارتىلدى. ونىڭ ىشىندە 5235 ءى ىشكى ىستەر ورگاندارى ارقىلى ق ر ازاماتتىعىن قابىلدادى»، - دەدى عاني شىمىربايەۆ.

ەسكە سالا كەتەيىك، وسى جىلدىڭ باسىندا ق ر ەڭبەك جانە حالىقتى الەۋمەتتىك قورعاۋ مينيسترلىگى قازاقستاندا ازاماتتىق الماعان ورالماندارعا مارتەبەسىن ۇزارتۋعا قاتىستى تۇسىنىكتەمە بەرگەن بولاتىن.

ايتا كەتسەك، بۇگىن «وتانداستار قورى» كوممەرتسيالىق ەمەس اكتسيونەرلىك قوعامى جانىنداعى قوعامدىق كوميسسياسى «شەتەلدەگى وتانداستاردى مەملەكەتتىك قولداۋ تۋرالى» قازاقستان رەسپۋبليكاسى زاڭ جوباسىن تالقىلادى. جيىن بارىسىندا «وتانداستار قورى» شەتەلدەگى قانداستارعا قازاق كارتاسىن قازاقستاننىڭ باسقا مەملەكەتتەردەگى ەلشىلىكتەرى ارقىلى بەرۋدى ۇسىندى.

سوڭعى جاڭالىقتار