قازاقستانعا جىل باسىنان 6 مىڭ قانداس كوشىپ كەلدى - ۆيتسە- پرەمەر
بۇل تۋرالى ۇكىمەتتىڭ باسپا ءسوز ورتالىعىندا پرەمەر- ءمينيستردىڭ ورىنباسارى بەردىبەك ساپاربايەۆ ءمالىم ەتتى، دەپ حابارلايدى قازاقپارات ءتىلشىسى.
«كەيىنگى كەزدە الەۋمەتتىك جەلىلەردە باسقا مەملەكەتتەردە تۇراتىن قانداستار تۋرالى ماسەلەلەر كوبەيىپ كەتتى. شىنىمەن دە، ەلباسى كەشە دۇرىس ايتتى: قانداستارىن تۋعان جەرىنە شاقىرىپ العان قازاقستان دۇنيەدەگى از عانا مەملەكەتتەردىڭ ءبىرى. سىزدەر جاقسى بىلەتىندەي، وتكەن ۋاقىتتىڭ ىشىندە 1 ميلليوننان استام قانداسىمىز قازاقستانعا كوشىپ كەلدى. ولاردىڭ بارلىعىنا كومەك جاسالادى. ال ەندى بىزگە كومەك جاسالمادى دەگەن تۇسىنىكسىز. ولاردى زەرتتەپ قاراۋ كەرەك» ، - دەدى بەردىبەك ساپاربايەۆ ۇكىمەتتىڭ باسپا ءسوز ورتالىعىندا تىلشىلەردىڭ سۇراعىنا جاۋاپ بەرە وتىرىپ.
ۆيتسە- پرەمەر قانداستارعا بىرىنشىدەن، تۇرعىن ءۇي بويىنشا كومەك كورسەتىلىپ، بىرنەشە وڭىردە تۇتاس اۋىلداردىڭ سالىنعانىن ايتىپ ءوتتى.
«پاۆلودار مەن شىعىس قازاقستاندا، شىمكەنت قالاسىندا اۋىلدار سالىندى. ودان باسقا، التى وڭىردە كەلەتىن ءبىزدىڭ وتانداستارىمىزدى قازاقستاننىڭ زاڭىنا، ومىرىنە، سالتىنا بەيىمدەۋ ءۇشىن وڭالتۋ ورتالىقتارى سالىنعان بولاتىن. ودان كەيىن ءاربىر سىرت مەملەكەتتەن كەلەتىن وتانداستارىمىزدىڭ جول شىعىندارى، كۇنكورىسكە كەتەتىن شىعىندارى، جۇمىسقا ورنالاستىرۋ، بالالارىن مەكتەپكە، بالاباقشاعا ورنالاستىرۋ، مەديتسينالىق قىزمەتپەن قامتۋ - بارلىعى مەملەكەتتىڭ موينىندا. قازىرگى ەسەپ بويىنشا، وتكەن 25 جىلدىڭ ىشىندە 150 ميلليارد تەڭگەدەي قارجى جۇمسالدى. ول جۇمىس ەندى جالعاسىن تاۋىپ جاتىر. وسى وتكەن 7 ايدىڭ ىشىندە 6 مىڭنان استام قانداس كوشىپ كەلدى. بۇل جۇمىس جالعاسىن تابادى» ، - دەدى بەردىبەك ساپاربايەۆ.
ونىڭ سوزىنشە، كەيبىر قانداستارىمىز دەر كەزىندە قۇجاتتارىن تاپسىرماعاندىقتان، قازاقستان ازاماتتىعىن الا الماي ءجۇر.
«ول قۇجاتتىڭ مەرزىمى ءبىر- اق جىل. ەلباسىنىڭ تاپسىرماسىنا سايكەس، مەرزىم وسى جىلدىڭ اياعىنا دەيىن سوزىلدى. سونى پايدالانىپ، ازاماتتىق الا الماي جۇرگەن قانداستارىمىز ازاماتتىعىن الۋى كەرەك» ، - دەدى پرەمەر ورىنباسارى.