قازاقستاندا كوپبالالى انالارعا جىلىنا 6 مىڭ پاتەر بولىنەدى
«2019-جىلعى بيۋجەتتى العاشقى رەت ناقتىلاۋ اياسىندا مەملەكەت باسىشىسىنىڭ Nur Otan پارتياسىنىڭ XⅧ سەزىندە تاپسىرعان ماسەلەلەرىن جۇزەگە اسىرۋعا جانە كوپبالالى انالار ءۇشىن ارەندالىق باسپانا سالۋ مەن ساتىپ الۋ ءۇشىن وڭىرلەرگە 50 ميلليارد تەڭگە ءبولىندى. جالپى العاندا، وسى ماقساتقا الداعى 7 جىلعا 350 ميلليارد تەڭگە قاراستىرىلىپ وتىر. بۇل جىلىنا 6 مىڭ كوپبالالى انانى باسپانامەن قامتۋعا جەتكىلىكتى. 7 جىلدا بەرىلەتىن پاتەرلەر سانى 40 مىڭعا جەتەدى»، - دەلىنگەن حابارلامادا.
سونداي-اق ۆەدومستۆو وكىلدەرىنىڭ حابارلاۋىنشا، مەملەكەت باسشىسىنىڭ تاپسىرماسىن ورىنداۋ جۇمىستارىنىڭ اياسىندا نۇر-سۇلتان، الماتى، شىمكەنت قالالارىنداعى جۇمىسسىز جۇرگەن جاستارعا قاجەتتى جالدامالى پاتەر قۇرىلىسىنا 2019-جىلعا 7,2 ميلليارد تەڭگە قارالعان.
«الەۋمەتتىك جاعدايى تومەن تۇرعىندارعا ارنالعان جالدامالى تۇرعىن ءۇي سالۋعا بولىنگەن 35 ميلليارد تەڭگەنىڭ 2,2 ميلليارد تەڭگەسى قايتا جولداندى. قوسىمشا رەسپۋبليكالىق بيۋجەتتەن 5 ميلليارد تەڭگە بولىنەتىن بولدى. وسىلايشا، الداعى 3 جىلدا جاس ماماندارعا ارنالعان 3 مىڭ باسپانانىڭ قۇرىلىسىنا 21,6 ميلليارد تەڭگە قاراستىرىلىپ وتىر»، - دەپ ناقتىلادى مينيسترلىك وكىلدەرى.
مينيسترلىك وكىلدەرىنىڭ حابارلاۋىنشا، «نۇرلى جەر» باعدارلاماسىنىڭ اياسىندا جىلىنا 12,16 ميلليون شارشى مەتر باسپانا سالۋ جوسپارلانىپ وتىر. سونىڭ ناتيجەسىندە 650 مىڭ وتباسى نەمەسە 2 ميلليون ادام باسپانالى بولادى.