قازاقستان ارقىلى ينتەرنەت-سالەمدەمە ترانزيتىن 6 ەسەگە ۇلعايتۋعا بولادى - ۇلتتىق ەكونوميكا ءمينيسترى
بۇل تۋرالى بۇگىن حالىقپەن ەسەپتىك كەزدەسۋ وتكىزىپ جاتقان ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«تاياۋ 5 جىلدىڭ ىشىندە ەلەكتروندى ساۋدا اينالىمى 1 تريلليون دوللارعا ارتاتىندىعى كۇتىلىپ وتىر. ءبىز ەۋروپا مەن قىتاي اراسىندا، تۇتىنۋشى مەن سالەمدەمەلەردى جونەلتۋشىلەردىڭ اراسىندا وتە ءتيىمدى ورنالاسقانبىز. سوندىقتان كولىك لەگىن قازاقستان ارقىلى جونەلتۋدىڭ كەلەشەگى ۇلكەن. بۇل ءۇشىن بارلىق ينفراقۇرىلىم بار. مۇنداي سالەمدەمەلەردى راسىمدەۋ ءۇشىن بارلىق كەدەندىك تۇزەتۋلەر ەنگىزىلگەن. ءبىز تاياۋ جىلدارى قازاقستان ارقىلى ينتەرنەت-سالەمدەمە ترانزيتىن 6 ەسەگە ۇلعايتۋعا بولادى دەپ ەسەپتەيمىز»، - دەدى مينيستر.
ونىڭ اتاپ وتۋىنشە، ونلاين-ساۋدانى ىنتالاندىرۋ ءۇشىن ينتەرنەتتە ەلەكتروندى ءادىس ارقىلى ساۋدا جاسايتىندارعا تابىس سالىعى مەن كورپوراتيۆتىك تابىس سالىعى بىرنەشە جىلعا الىنىپ تاستالعان. ەكسپورتقا ارنالعان تاۋارلاردى دەكلاراتسيالاۋ دا جەڭىلدەتىلگەن.
«ەندىگى ۋاقىتتا ينتەرنەت ارقىلى ساتىپ الىناتىن پوشتا قۇجاتتارى نەمەسە سالەمدەمەلەر كوتەرمە راسىمدەلۋى مۇمكىن. ەندى پوشتا قۇجاتتارى دەكلاراتسيا رەتىندە تانىلادى. ەلەكتروندى ساۋدا وتە قارقىندى دامىپ كەلەدى جانە بارىنشا ءتيىمدى سەكتور سانالادى»، - دەدى رۋسلان دالەنوۆ.
مينيسترلىكتىڭ دەرەگىنشە، ەلىمىزدە تۇتىنۋشىلاردىڭ قۇقىعىن قورعاۋ ينستيتۋتى كۇشەيتىلىپ جاتىر. ەلەكتروندىق ساۋداداعى ساتىپ الۋشى كادىمگى ساۋداداعىداي قورعالعان. ەلەكتروندىق ساۋدا شارتتارى جاقسارتىلۋدا. وتكەن جىلى ونىڭ بولشەك ساۋداداعى ۇلەسى 1,9 دان 2,9 پايىزعا نەمەسە 92 ميلليارد تەڭگەگە ۇلعايدى.