ورالدا جۇرگىزۋشى بىرەۋدىڭ اۋلاسىنا 6 تونناعا جۋىق سىيىر تەرىسىن ءتۇسىرىپ كەتكەن

 ورال. قازاقپارات - ورالدا ءىرى قارا تەرىسىن ساياجاي اۋماعىنا ءتۇسىرىپ كەتكەن جۇرگىزۋشى جاۋاپقا تارتىلدى، دەپ حابارلايدى قازاقپارات ءتىلشىسى.

باتىس قازاقستان وبلىستىق پوليسيا دەپارتامەنتىنىڭ باسپا ءسوز قىزمەتىنەن الىنعان مالىمەتكە قاراعاندا، 17 - قاڭتار كۇنى ساعات 13.59 دا ايەل ادام بەلگىسىز بىرەۋدىڭ « وربيتا» ساياجاي قوعامداستىعى اۋماعىنا ءىرى قارا تەرىسىن ءتۇسىرىپ كەتكەندىگىن حابارلاعان.

وقيعا ورنىنا اباي پوليسيا ءبولىمىنىڭ ۋچاسكەلىك ينسپەكتورلارى بارىپ، بەينەباقىلاۋ كامەراسىنىڭ كومەگىمەن اۆتوكولىكتى، سودان كەيىن جۇرگىزۋشىنى انىقتادى.

 ءمالىم بولعانىنداي، 13 - قاڭتار كۇنى ءتۇن ورتاسىندا ورال قالاسىندا تۇراتىن 1989 - جىلعى جۇرگىزۋشى « كاماز-5511» اۆتوكولىگىمەن سالماعى شامامەن 5-6 تونناداي سىيىر تەرىسىن ءتۇسىرىپ، تايىپ تۇرعان.

قازىرگى كەزدە اتالمىش جۇرگىزۋشى ق ر اكىمشىلىك قۇقىقبۇزۋشىلىق كودەكسىنىڭ 505-بابىنا (قالالار مەن ەلدى مەكەندەردىڭ اۋماقتارىن اباتتاندىرۋ قاعيدالارىن بۇزۋ، سونداي- اق قالالار مەن ەلدى مەكەندەر ينفراقۇرىلىمى وبەكتىلەرىن بۇزۋ، جاسىل ەكپەلەرىن جويۋ جانە ءبۇلدىرۋ) سايكەس اكىمشىلىك جاۋاپكەرشىلىككە تارتىلدى.

ايتا كەتەيىك، وتكەن جىلى وبلىس بويىنشا وسى باپقا سايكەس 3927 زاڭبۇزۋشىلىق بەلگىلى بولدى. ال ورال قالاسى پوليتسيا باسقارماسى جەدەل باسقارۋ ورتالىعىنىڭ مالىمەتىنە سايكەس بەينەباقىلاۋ كامەرالارىنىڭ كومەگىمەن 2018 - جىلى 16104 اكىمشىلىك قۇقىقبۇزۋشىلىقتىڭ جولى كەسىلدى.