قازاقستاندا 6 مىڭ اسكەري قىزمەتشىگە جەڭىلدەتىلگەن زايم بەرىلەدى
«وسى جىلى ءبىز اسكەري قىزمەتشىلەرگە ارنالعان اسا ماڭىزدى جوبانى باستادىق. ول وتان قورعاۋشىلارعا باسپانا الۋعا مۇمكىندىك بەرەدى. بۇل ماقساتتا بانك 98 ميلليارد تەڭگە ءبولىپ وتىر. ونىڭ 74 ميلليارد تەڭگەسى اسكەري قىزمەتشىلەرگە نەسيە بەرۋگە جۇمسالادى. قالعان 24 ميلليارد تەڭگەنى كەيبىر زايمداردى قايتا قارجىلاندىرۋعا باعىتتايمىز. نەسيە بەرۋ اشىق ءارى ادىلەتتى ءجۇرۋ ءۇشىن ارنايى ۇپاي جۇيەسىن ەنگىزدىك.
نەگىزگى كورسەتكىش - ۇمىتكەرلەردىڭ اسكەري قىزمەت اتقارعان مەرزىمى. ءبىر اي ىشىندە - 2- شىلدە مەن 1- تامىز ارالىعىندا بانك اسكەري قىزمەتشىلەردەن ءوتىنىش قابىلدادى. بانك ۇمىتكەرلەرگە زايمنىڭ ءۇش ءتۇرىن ۇسىنادى. ءبىر ايدىڭ ىشىندە 13 مىڭداي ءوتىنىش كەلىپ ءتۇستى. قازىر 4400 ءوتىنىش ىرىكتەپ الىندى. مىڭنان استامى قاراستىرىلىپ جاتىر. ءوتىنىش سانى بويىنشا استانا مەن الماتى، وسكەمەن قالالارى كوش باستاپ تۇر»، - دەدى و ك ق- دا وتكەن باسپا ءسوز ءماسليحاتىندا «تۇرعىن ءۇي قۇرىلىس جيناق بانكى» ا ق باسقارما ءتورايىمى ءلاززات يبراگيموۆا.
باسقارما ءتورايىمى اتاپ وتكەندەي، ماسەلەن ءۇي قۇنىنىڭ 5 پايىزىنا تەڭ باستاپقى جارناسى بار اسكەري قىزمەتشى جىلدىق مولشەرى 7 پايىز بولاتىن نەسيەگە ۇمىتكەر بولا الادى. بۇل جاعدايدا كليەنت تاڭداعان باسپانا - جاڭا ۇيلەر نارىعىنان قۇرىلىس جۇرگىزىپ جاتقان قۇرىلىس جۇرگىزۋشىگە تيەسىلى بولۋى كەرەك. ەكىنشىدەن، 20 پايىز كولەمىندەگى باستاپقى جارناسى بار اسكەري قىزمەتشى ءۇشىن نەسيەنىڭ جىلدىق مولشەرلەمەسى 6 پايىزعا تومەندەيدى. مۇندا دا ءۇيدى قۇرىلىس سالۋشىنىڭ وزىنەن ساتىپ الۋ كەرەك.
ال قايتالاما نارىقتان ءوزىم تاڭداپ الامىن دەگەن اسكەري قىزمەتشىگە تۇرعىن ءۇي قۇرىلىس جيناق بانكىندەگى دەپوزيتكە 20 پايىزعا تەڭ باستاپقى جارنا جيناۋ كەرەك. وسىلايشا، ول جىلدىق مولشەرلەمەسى 8 پايىز بولاتىن نەسيەگە ءوتىنىش بەرە الادى.
قازىرگى ۋاقىتتا اتالمىش زايمعا ۇمىتكەرلەر تىزىمىنە شەكارا قىزمەتى، ۇلتتىق ۇلان، اسكەري پروكۋراتۋرا، ىشكى ىستەر مينيسترلىگى، قورعانىس مينيسترلىگى مەن مەملەكەتتىك قورعاۋ قىزمەتتەرىنىڭ قىزمەتكەرلەرى ەنەدى.