سولتۇستىكتە وقىعىسى كەلەتىن تۇركىستاندىق جاستارعا 6 مىڭعا جۋىق گرانت ءبولىندى

تۇركىستان. قازاقپارات - ۇكىمەت جاستار ماسەلەسىنە ارناپ «ماڭگىلىك ەل جاستارى - يندۋسترياعا» («سەرپىن») جوباسىن ۇسىنعان بولاتىن.

باعدارلاما باستالعان 4 جىلدان بەرى تۇركىستان وبلىسى بويىنشا جوعارى وقۋ ورىندارىندا - 6490، كوللەدجدەردە - 1938 جاس ءبىلىم الۋدا، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

وسىلايشا باعدارلاما اياسىندا ءبىلىم الىپ جاتقان بۇكىل جاستىڭ 50 پايىزى - وڭتۇستىك وڭىرگە تيەسىلى. بۇل تۋرالى تۇركىستان وبلىستىق وڭىرلىك كوممۋنيكاتسيالار قىزمەتىندە وتكەن بريفينگتە وتباسى، بالالار جانە جاستار ءىسى جونىندەگى باسقارما باسشىسىنىڭ ورىنباسارى مۇحتار سەيتجاپباروۆ ءمالىم ەتتى.

وتكەن جىلى «ماڭگىلىك ەل جاستارى - يندۋسترياعا» باعدارلاماسى اياسىندا 4513 گرانت بولىنگەن بولاتىن. بيىل تۇركىستان وبلىسىندا مەكتەپتى 33 مىڭنان استام وقۋشى ءبىتىرىپ، ولاردىڭ 22091 ءى ۇلتتىق ءبىرىڭعاي تەستىلەۋگە قاتىسقان. ونىڭ 19 مىڭنان استامى شەكتى بالدى جينادى.

«2018-2019 وقۋ جىلىندا «ماڭگىلىك ەل جاستارى - يندۋسترياعا» جوباسىنا 5829 مەملەكەتتىك گرانت ءبولىنىپ وتىر. ونىڭ ىشىندە، جوعارى وقۋ ورىندارىنا - 5089 گرانت بولىنسە، كاسىپتىك-تەحنيكالىق كوللەدجدەرگە - 740 گرانت قاراستىرىلعان. بيىل تالاپكەرلەردەن قۇجات قابىلداۋ مەرزىمى ەرتە باستالدى. ياعني اعىمداعى جىلدىڭ 18-26- شىلدە ارالىعىندا قازاقستان بويىنشا بارلىق جوعارى وقۋ ورىندارىندا قۇجاتتار قابىلدانادى»، - دەدى مۇحتار سەيداحمەت ۇلى.

ايتا كەتەرلىگى، «ماڭگىلىك ەل جاستارى - يندۋسترياعا» جوباسىنا قۇجات ءوڭىر بويىنشا 3 نۇكتەدە قابىلدانادى. ولار: تەحنيكالىق عىلىمدار سالاسى بويىنشا - م. اۋەزوۆ اتىنداعى و ق م ۋ «ا» عيماراتى، پەداگوگيكالىق ماماندىقتار بويىنشا - و ق م پ ۋ «ب» عيماراتى جانە ق. ا. ياساۋي اتىنداعى حالىقارالىق قازاق-تۇرىك ۋنيۆەرسيتەتى. كاسىپتىك-تەحنيكالىق كوللەدجدەردە ءبىلىم الۋعا نيەتتى تالاپكەرلەردەن قۇجات قابىلداۋ وبلىستىق «جاستار رەسۋرستىق ورتالىعى» عيماراتىندا اعىمداعى جىلدىڭ 20- تامىزىنا دەيىن جالعاسادى.