اتىراۋدا ومىراۋىنان ايىرىلعان ايەلگە 6 ميلليون تەڭگە تولەنەتىن بولدى

اتىراۋ. قازاقپارات - اتىراۋ قالالىق سوتىندا مەديتسينا قىزمەتكەرلەرىنىڭ سالعىرتتىعىنان ايەل ادامنىڭ دەنساۋلىعىنا كەلتىرىلگەن زياندى وتەۋگە قاتىستى ازاماتتىق ءىس قارالدى، دەپ حابارلايدى قازاقپارات ءتىلشىسى.

وبلىستىق سوتتىڭ باسپا ءسوز قىزمەتى حابارلاعانداي، اتىراۋ تۇرعىنى 2№ قالالىق ەمحانا مەن وبلىستىق ونكولوگيالىق ديسپانسەرگە قاتىستى 3 ميلليون 422 مىڭ تەڭگە كولەمىندە ماتەريالدىق شىعىندار مەن 20 ميلليون تەڭگە كولەمىندە مورالدىق زياندى وتەۋ تۋرالى سوتقا تالاپ-ارىز بەردى. سوت شەشىمى بويىنشا ول 6 ميلليون 130 مىڭ تەڭگە الاتىن بولدى.

تالاپكەر 2016-جىلى ناۋرىز ايىندا ەمحاناعا وڭ جاق كەۋدەسىنىڭ اۋىراتىنىن ايتىپ، شاعىمدانىپ بارعان. كلينيكانىڭ دارىگەرلەرى اۋرۋعا دەر كەزىندە دياگنوز قويا الماعان، سونىڭ سالدارىنان ناۋقاستىڭ جاعدايى ناشارلاي بەرگەن. كەيىنىرەك ول ونكولوگيالىق ديسپانسەرگە جىبەرىلىپ، وندا دارىگەرلەر شۇعىل بيوپسيا جاساعان. ال اتىراۋ سوت ساراپتاما ينستيتۋتىنىڭ قىزمەتكەرلەرى ايەلدىڭ وڭ جاق ءسۇت بەزىنەن قاتەرلى ىسىك بولعانىن ايتىپ وتىر.

«2№ ەمحانا مەن وبلىستىق ونكولوگيالىق ديسپانسەردەن 3 ميلليون 130 مىڭ تەڭگە ماتەريالدىق شىعىن جانە 3 ميلليون تەڭگە كولەمىندە مورالدىق زالال وندىرىلەتىن بولدى. سوت شەشىمى زاڭدى كۇشىنە ەندى. كىنالى دارىگەرلەرگە قاتىستى قىزمەتتىك تەرگەۋ جۇمىستارى جۇرگىزىلۋدە»، دەيدى وبلىستىق سوتتىڭ باسپا ءسوز حاتشىسى بورانباي عاليەۆ.