بار جوعى 69 دوللار ءۇشىن قازا بولعان 42 ادامنىڭ وقيعاسى

نۇر-سۇلتان. قازاقپارات - 37 جاسار ستيۋاردەسسا دەبورا نەيل ۇشقىشتار كابيناسىنا: «بىزدە قيىندىق تۋىندادى!»، - دەپ جۇگىرىپ كەلدى.

اۋە كەمەسىنىڭ كومانديرى گرەگگ ليندامۋد: «نە بوپ قالدى؟»، - دەپ سۇرادى.

ستيۋاردەسسانىڭ ارتىنان: «مەن- قيىندىقپىن»، - دەگەن داۋىس شىقتى. بىرنەشە سەكۋندتاردان كەيىن دەبورامەن ەكى پيلوت قازا بولدى.

اپات

اۋە اپاتتارىنىڭ نەگىزگى سەبەپتەرى تەحنيكالىق اقاۋلار، اۋىر تابيعي جاعدايلار جانە ۇشقىشتاردىڭ قاتەلىكتەرى. ءتىپتى تەرروريستەردىڭ ساياسي ماقساتتارىنىڭ قۇربانى دا بولىپ جاتادى. ءبىراق 1987 -جىلدىڭ 7-جەلتوقسانىندا كاليفورنيا قالاسىندا ورىن العان جانتۇرشىگەرلىك وقيعانىڭ ساياساتقا ەش قاتىسى بولمادى. كەك الۋعا قۇلشىنعان ادامنىڭ كەسىرىنەن ونداعان ادام مەرت بولدى.

لوس- اندجەلەس- سان- فرانسيسكو باعىتى بويىنشا Pacific Southwest Airlines (PSA) اۋەكومپانياسىنىڭ BAe 146-200A اۆيالاينەرى، PSA 1771 رەيسى اۋەجايدان ۇشىپ، 16 مينۋتتان كەيىن وپات بولدى. ۇشاق ۇلكەن جىلدامدىقتا-1240 ك م ساع.، جەرگە سوعىلدى. جويقىن سوقتىعىستان كەيىن ۇشاقتاعى 38 جولاۋشى مەن ەكيپاجدىڭ بەس مۇشەسىنىڭ امان قالۋى ەكىتالاي ەدى. قازا تاپقانداردىڭ سۇيەكتەرىنىڭ زاقىمدانعانى سونشالىقتى ءتىپتى ولاردىڭ كىمگە تيەسىلى ەكەندىگىن انىقتاۋ قيىنعا سوققان.

قارىشتاپ قۇلاۋدىڭ سەبەبى نە بولدى؟

ۇشقىشتار قانداي دا ءبىر اقاۋلار جايلى بايانداعان جوق، ۇشۋدىڭ العاشقى مينۋتتارى دا قالىپتى بولدى. ساراپشىلاردىڭ زەرتتەۋلەرىنشە ۇشاق سوقتىعىسقا دەيىن ءبۇتىن بولعان، سوندىقتان اۋەدە جارىلىس بولۋى مۇمكىن دەگەن بولجامدار جوققا شىعارىلدى.

«مەن وتباسىم ءۇشىن راقىمشىلىق سۇراپ ەدىم، ەسىڭدە مە؟»

اپات بولعان جەردە ەكى كۇندىك ىزدەۋلەردەن كەيىن ساراپشىلاردىڭ ءبىرى جازۋى بار گيگيەنالىق قاپقا نازار اۋداردى. جاقىنداتىپ قاراعاننان كەيىن ونىڭ جازبا ەكەنى انىقتالدى: «سالەم، رەي. ءبارىنىڭ وسىلاي اياقتالۋى تاعدىردىڭ تالكەگى. مەن وتباسىم ءۇشىن راقىمشىلىق سۇراپ ەدىم، ەسىڭدە مە؟ مەن ونى المادىم. سەن دە المايسىڭ!

كەيىننەن اپات بولعان جەردەن Smith-Wesson Model 29 تاپانشاسى تابىلدى. ونىڭ ىشىندە 44 Magnum گيلزا وقتارىنىڭ التى ورنى بوس تۇردى. بۇل جوعارعى قۋاتتى وقتارمەن اڭشىلار افريكالىق وگىزدەرگە اڭشىلىق ەتكەن.

اتقان ادام بىردەن انىقتالدى، سەبەبى تاپانشانىڭ ىشىندە ونىڭ ساۋساعى تۇرىپ قالعان. قىلمىسكەر USAir اۋەكومپانياسىنىڭ بۇرىنعى قىزمەتكەرى 35 جاسار دەۆيد ا. بەرك بولىپ شىقتى. رەيگە جازىلعان جازبا قىلمىسكەرگە تيەسىلى ەكەنى انىقتالدى.

اۋىر كۇمان جانە جەڭىل ۇرلىق

دەۆيد بەرك 1952 -جىلى ۇلى بريتانيادا يامايكالىق كەلىمسەكتەردىڭ وتباسىندا دۇنيەگە كەلگەن. كەيىنىرەك وتباسىمەن بىرگە امەريكا قۇراما شتاتتارىنا قونىس اۋداردى.

بەرك USAir كومپانياسىندا بيلەت ساتاتىن اگەنت بولىپ جۇمىس ىستەگەن. روچەستەردەگى كەڭسەدە جۇمىس اتقارىپ جۇرگەنىندە ونىڭ ەسىرتكى كونترابانداسىنا قاتىسى بار دەگەن كۇدىك تۋىندادى.

بەرككە ايىپ تاعىلعان جوق، ويتكەنى ونىڭ بۇل ىسكە قاتىسى بار ەكەندىگىن كورسەتەتىن ناقتى دالەلدەر بولمادى. بۇل وقيعانىڭ بەتىن جابۋ ءۇشىن قىزمەتكەردى لوس- اندجەلەسكە اۋىستىردى.

الايدا جاڭا جۇمىس ورنىندا دا بەرك تۇسىنىكسىز وقيعاعا قاتىستى بولىپ شىقتى. ول 69 دوللار ۇرلادى دەگەن كۇدىك تۋىندادى. ونىڭ ەسىرتكىگە قاتىسى بار دەگەن وقيعاسى بولماعاندا، بالكىم، جەڭىل ۇرلىققا باسشىلىق كوز جۇمار ما ەدى.

بەركتىڭ لوس- اندجەلەستەگى باستىعى بولعان رەيموند ف. تومسون ونىڭ وتىنىشتەرى مەن جالىنۋىنا قاراماستان ونى جۇمىستان شىعارىپ جىبەردى.

دەۆيد بەرك ەشقاشان ۇيلەنبەگەن، ءبىراق ونىڭ ءارتۇرلى ايەلدەن جەتى بالاسى بولعان. ونىڭ قۇربىلارى بەركتىڭ قىزۋقاندى جانە زورلىققا بەيىم ەكەندىگى جايلى ايتقان.

بەركتى جۇمىستان شىعارعان باسشىلىق ونىڭ ۇشۋ الاڭىنا جانە قىزمەت رەيستەرىمەن ۇشۋىنا رۇقسات ەتىلگەن جەتونىن الۋدى ۇمىتىپ كەتكەن. اشۋعا بۋلىققان قىزمەتكەر بۇل مۇمكىندىكتى قولدانۋعا بەل بۋادى.

التى اتىس

تانىستارى ارقىلى تاپقان تاپانشاسىن 7-جەلتوقسان كۇنى 1771 رەيستىڭ بورتىنا ءساتتى الىپ كىردى.

ۇشاقتا PSA جانە USAir اۋەكومپانياسىنىڭ قىزمەتكەرلەرىنىڭ كوپ بولۋى بەركتىڭ جانىنا مايداي جاقتى.

14 مينۋتتان كەيىن بەرك ىسكە كىرىستى. رەي تومپسون وزىنە ارنالعان جازبانى وقىپ ۇلگەرگەنى بەلگىسىز، ءبىراق بەركتىڭ العاشقى قۇربانى رەي ەكى اتىلعان وقتان كوز جۇمدى.

ۇشقىشتاردى قاۋىپ تۋرالى ەسكەرتۋ ءۇشىن كابيناعا جۇگىرىپ بارعان ستيۋاردەسسا دەبورا نەيلدى، ارتىنشا ۇشقىشتاردى بەرك اتىپ ءولتىردى.

PSA اۋەكومپانياسىنىڭ باس ۇشقىشى دجون كونتە اتالمىش رەيستە جولاۋشى بولادى. تاپانشا دىبىسىن ەستي سالىسىمەن ول ۇشقىشتار كابيناسىنا بەتتەي بەرە بەركتىڭ قولىنان قازا تابادى.

قولىنان تاپانشاسىن تاستاماي، قىلمىسكەر جەرگە وتىرىپ، ۇشاقتىڭ جەرمەن سوقتىعىسۋ ساتىنە دەيىن تابجىلماعان.

شارالار قولدانىلدى

تەرگەۋ ءىسىنىڭ ناتيجەلەرى بويىنشا 1771 رەيستىڭ اپات بولۋى ا ق ش-تاعى ءبىرقاتار زاڭداردىڭ وزگەرۋىنە سەپتىگىن تيگىزدى. بۇدان بىلاي ەكيپاجدىڭ بارلىق مۇشەلەرى جانە اۋەكومپانيانىڭ قىزمەتكەرلەرى جولاۋشىلار سياقتى مىندەتتى تۇردە ۇشۋ الدىنداعى تەكسەرىستەن ءوتۋى ءتيىس. ودان بولەك، جۇمىستان شىعارىلعان قىزمەتكەرلەردىڭ جۇمىسقا كىرۋ رۇقساتنامالارى مەن جەتوندارى ەڭبەك كەلىسىمى توقتاتىلعان سوڭ الىناتىن بولعان.

باقىتىمىزعا وراي الەم اۆياتسياسىندا بۇنداي قايعىلى جاعدايلار كوپ ەمەس. الايدا جىل ارتقان سايىن قاۋىپسىزدىك قىزمەتىنىڭ تەكسەرىستەرى قاتاڭدالىپ كەلەدى، ويتكەنى دەر كەزىندە انىقتالماعان ەسسىزدىڭ قولىنان جۇزدەگەن ادامنىڭ ءومىرى قيىلۋى مۇمكىن.

stan.kz