ارشالى اۋدانىندا 6895 ۇيگە گاز تارتىلادى - اقمولا وبلىسى

كوكشەتاۋ. قازاقپارات - ارشالى ءۇشىن اعىمداعى جىلى جۇزەگە اسىرىلاتىن الەۋمەتتىك ماڭىزدى جوبا - اۋداننىڭ ەلدى مەكەندەرىن گازداندىرۋ.

وسى رەتتە، اۋدان «سارىارقا» گاز قۇبىرىنا العاشقىلاردىڭ ءبىرى بولىپ قوسىلادى. اۋداندا بارلىعى 17 ەلدى مەكەن گازداندىرۋعا جاتادى، دەپ حابارلايدى قازاقپارات ءتىلشىسى.

«بارلىق 17 جوبا بويىنشا جوبالىق-سمەتالىق قۇجاتتاما ازىرلەنىپ، مەملەكەتتىك ساراپتامانىڭ وڭ قورىتىندىسى الىندى. جالپى ارشالى اۋدانى بويىنشا گازداندىرۋ 6895 ءۇيدى، 24,5 مىڭ ادامدى قامتيدى»، - دەدى اۋدان اكىمى ايدار بايمانوۆ وڭىرلىك كوممۋنيكاتسيالار قىزمەتىندە وتكەن بريفينگىدە.

اكىمنىڭ ايتۋىنشا، 2020-جىلى وتپەلى 4 جوبا بويىنشا ارشالى كەنتىندەگى اۆتوماتتى گاز تاراتۋ ستانتسياسىنىڭ قۇرىلىسى باستالدى. جابدىقتاردى جەتكىزۋ جانە مونتاجداۋ بويىنشا، ەلەكترمەن جابدىقتاۋ جانە تەحنولوگيالىق جابدىقتى بايلانىستىرۋ بويىنشا جۇمىستار اياقتالدى.

جىبەك جولى جانە جالتىركول اۋىلدارىنا گاز جەتكىزەتىن قۇبىر قۇرىلىسى بويىنشا 15 شاقىرىم گاز قۇبىرى سالىندى. اياقتالۋ مەرزىمى - قارجىنىڭ بولىنۋىنە بايلانىستى 2023-جىلعا جوسپارلانعان.

«سونىمەن بىرگە، انار جانە دونەتسكوە اۋىلدارىنا گاز قۇبىرىن جانە قۇبىر تارماقتارىن سالۋ جۇمىستارى قولعا الىندى. وسى جوبا بويىنشا 20 شاقىرىم گاز قۇبىرى تارتىلدى. ەندىگى ارادا گاز قۇبىرىنىڭ اۋىل ىشىندەگى 29 شاقىرىمىن سالۋ قاجەت. بۇل جۇمىستاردى اياقتاۋ مەرزىمى 2021-جىلعا جوسپارلانىپ وتىر. ال ارشالى كەنتىندە گاز قۇبىرىنىڭ قۇرىلىسى اياسىندا 1700 مپوليەتيلەن قۇبىرى توسەلدى، 750 تىرەۋ ورناتىلدى. اعىمداعى جىلى 6 جاڭا جوبا بويىنشا جۇمىستاردى باستاۋ جوسپاردا بار. جالپى 2021-جىلى اۋداندى گازداندىرۋ بويىنشا جالپى سوماسى 4 ميلليارد تەڭگەگە جۇمىستار جۇرگىزۋ جوسپارلانۋدا»، - دەپ قوستى اۋدان اكىمى.