قازاقستان سايلاۋشىلارىنىڭ 68 پايىزى، ياعني 8 ميلليون ادام رەفەرەندۋمعا قاتىستى

نۇر- سۇلتان. قازاقپارات - ەلىمىزدە اتا زاڭعا ەنگىزىلەتىن وزگەرتۋلەر مەن تولىقتىرۋلارعا قاتىستى وتكىزىلگەن رەسپۋبليكالىق رەفەرەندۋمدا 8030739 ازامات بيۋللەتەن الدى.

بۇل تۋرالى ق ر ورتالىق رەفەرەندۋم كوميسسياسىنىڭ حاتشىسى مۇحتار ەرمان ايتتى، دەپ حابارلايدى قازاقپارات ءتىلشىسى.

«ورتالىق رەفەرەندۋم كوميسسسياسى استانا ۋاقىتىمەن ساعات 22.00-دە ەلىمىزدىڭ بارلىق وڭىرىندە جانە 25 شەتەلدىك ۋچاسكەدە داۋىس بەرۋ اياقتالعانىن حابارلايدى. قازاقستان رەسپۋبليكاسىنىڭ شەت مەملەكەتتەردەگى وكىلدىكتەرىنىڭ جانىنداعى 40 ۋچاسكەدە داۋىس بەرۋ ءالى دە جالعاسىپ جاتىر. وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ اۋماقتىق كوميسسيالارى ۇسىنعان الدىن الا دەرەكتەرى بويىنشا ازاماتتاردىڭ رەفەرەندۋمعا قاتىسۋ ستاتيستيكاسى مىناداي بولدى:

اقمولا وبلىسى - 73,81، اقتوبە وبلىسى - 58,06، الماتى وبلىسى - 72,83، اتىراۋ وبلىسى - 67,68، باتىس قازاقستان وبلىسى - 69,37، جامبىل وبلىسى - 69,59، قاراعاندى وبلىسى - 77,39، قوستاناي وبلىسى - 72,28، قىزىلوردا وبلىسى - 79,89، ماڭعىستاۋ وبلىسى - 61,19، پاۆلودار وبلىسى - 75,53، سولتۇستىك قازاقستان وبلىسى - 75,49، تۇركىستان وبلىسى - 80,66، شىعىس قازاقستان وبلىسى - 77,49، نۇر- سۇلتان قالاسى - 57,06، الماتى قالاسى - 33,30، شىمكەنت قالاسى - 72,53 پايىز»، - دەدى مۇحتار ەرمان.

ونىڭ اتاپ وتۋىنشە، ەلىمىز بويىنشا رەفەرەندۋمعا قاتىسۋ مۇمكىندىگى جانە قۇقىعى بار ازاماتتاردىڭ تىزىمىنە 11734642 ادام ەنگىزىلدى. 8030739 ازامات بيۋللەتەن الدى. بۇل - داۋىس بەرۋشىلەر تىزىمىندەگى ازاماتتاردىڭ 68,44 پايىزى.

«رەفەرەندۋم كوميسسيالارى داۋىس ساناۋعا كىرىستى. ەرتەڭ اۋماقتىق كوميسسيالار حاتتامالارىنىڭ ەلەكتروندى تۇردە ءتۇسۋىن كۇتەمىز. داۋىس بەرۋدىڭ الدىن الا قورىتىندىسى بريفينگتە جاريالانادى. ونىڭ ۋاقىتى قوسىمشا ايتىلادى»، - دەدى ورتالىق رەفەرەندۋم كوميسسياسىنىڭ حاتشىسى.

اۆتور: مارلان جيەمباي