بولاشاقتا الەم تۇرعىندارىنىڭ 67 پايىزى قالالاردا تۇرادى

نۇر- سۇلتان. قازاقپارات - ەلوردادا «باسكەلەستىك ترانسفورماتسياسى! ۇلتتار - ەنەرگيا - يندۋستريالار - قالالار - تالانتتار» دەگەن تاقىرىپپەن عالامدىق يننوۆاتسيالىق سامميت ءوتىپ جاتىر، دەپ حابارلايدى قازاقپارات ءتىلشىسى.

ءۇش كۇنگە جالعاساتىن سامميتكە ەكونوميكا، قارجى، تەحنولوگيا سالاسىنا ماماندانعان 50-دەن استام حالىقارالىق ساراپشى شاقىرىلىپ وتىر. جىل سايىن الەمنىڭ ءار ەلىندە وتەتىن اۋقىمدى شارا قازاقستان استاناسىندا تۇڭعىش رەت وتۋدە.

سامميتتىڭ اشىلۋىنا ق ر پرەمەر- ءمينيسترىنىڭ ءبىرىنشى ورىنباسارى- قارجى ءمينيسترى ءاليحان سمايىلوۆ قاتىسىپ، شارانىڭ قازاقستان ءۇشىن ماڭىزدى ەكەنىن توقتالدى.

«ۇكىمەت باسەكەگە قابىلەتتىلىكتى دامىتىپ، ينۆەستيتسيالىق احۋالدى جەتىلدىرۋ ءۇشىن 8 رەفورمالىق قۇجات دايىنداۋدا. بۇل قۇجاتتار 20-دان استام رەفورمالىق وزگەرىستى قامتىماق. سونىڭ ىشىندە شاعىن جانە ميكروبيزنەستى دامىتۋ سياقتى وزەكتى ماسەلەلەر بار. بيزنەستىڭ اتالمىش سالاسىنا تۇسەتىن سالىق جۇكتەمەسىن ازايتۋ بويىنشا مەملەكەت باسشىسىنىڭ تاپسىرماسى بار. وسى وزگەرىستەردىڭ ارقاسىندا ءبىر ميلليوننان استام كاسىپكەردىڭ 3 جىل بويى سالىق جۇكتەمەسى جەڭىل بولادى. بۇۇ بولجامى بويىنشا 2050 -جىلعا قاراي جەر بەتىندەگى ادامداردىڭ 67 پايىزى قالالاردا تۇراتىن بولادى. بۇل تەندەنتسيا تەحنولوگيا يگىلىكتەرىنە قولجەتىمدىلىك بويىنشا تەڭسىزدىكتەر تۋىنداتپاۋى كەرەك. سول ءۇشىن ەلىمىزدە «وڭىرلىك دامۋ» باعدارلاماسى قولعا الىنعان. بۇگىنگى سامميت وسى جاسالىپ جاتقان قادامداردىڭ ءتيىمدى تۇستارىن ناقتىلاپ، تارازىلاۋعا مۇمكىندىك بەرەدى»، - دەدى ءاليحان سمايىلوۆ.

سامميت اياسىندا ساراپشىلار ترانسۇلتتىق ەكونوميكالىق بايلانىستار، ەنەرگەتيكا، ۋربانيزاتسيا، ادام كاپيتالى سياقتى ماسەلەلەردى تالقىلايدى.

اۆتور: ەسىمجان ناقتىباي