جىل باسىنان بەرى ادام ساۋداسىنا قاتىستى 65 قىلمىس تىركەلگەن

None
استانا. قازاقپارات - ىشكى ىستەر ءمينيسترىنىڭ ورىنباسارى ەرجان سادەنوۆتىڭ مالىمەتى بويىنشا، جىل باسىنان بەرى ەلىمىزدە ادام ساۋداسىمەن بايلانىستى 65 قىلمىس تىركەلگەن، دەپ حابارلايدى قازاقپارات.

بۇل تۋرالى ول ءماجىلىستىڭ زاڭناما جانە سوت-قۇقىقتىق رەفورما كوميتەتىنە قازاقستان زاڭناماسىنا ادام ساۋداسىمەن كۇرەس باعىتىندا ۇسىنىلاتىن وزگەرىستەر مەن تۇزەتۋلەردى تانىستىرۋ كەزىندە ايتتى.

«جىل باسىنان بەرى وسى باعىتتا 65 قىلمىس تىركەلدى. ونىڭ ىشىندە قاناۋ ماقساتىمەن باس بوستاندىعىنان زاڭسىز ايىرۋدىڭ ءبىر فاكتىسى، جەزوكشەلىكپەن اينالىسۋعا تارتۋدىڭ 11 فاكتىسى (ونىڭ ىشىندە كامەلەتكە تولماعاندار - 3 فاكتى)، ادام ساۋداسىنىڭ 16 فاكتىسى (ونىڭ ىشىندە كامەلەتكە تولماعانداردى ساتۋدىڭ 12 فاكتىسى)، «جەڭگەتايلىق» جانە جەزوكشە ۇستاۋ ورىندارىن ۇيىمداستىرۋدىڭ 37 فاكتىسى بار»، - دەدى ول.

سونداي-اق، ەرجان سادەنوۆ جىل سايىن ادام ساۋداسىمەن اينالىساتىن 5 قىلمىستىق توپ اشكەرە بولاتىنىن اتاپ ءوتتى.

«6 ادامنان تۇراتىن ۇيىمداسقان قىلمىستىق توپ اشكەرە بولدى. ولار ءبىر جىل بويى جەزوكشە ۇستاۋ ورىندارىن ۇيىمداستىرىپ، «جەڭگەتايلىقپەن» اينالىسقان. جالپى جىل سايىن ادام ساۋداسى سالاسىندا 100 دەن استام قىلمىس تىركەلىپ، 5 ۇيىمداسقان قىلمىستىق توپتىڭ جولى كەسىلەدى»، - دەدى ۆيتسە-مينيستر.

سوڭعى جاڭالىقتار