قازاقستانعا كەلگەن رەسەيلىكتەردىڭ 65 پايىزى باسقا مەملەكەتتەرگە كەتكەن
28 قىركۇيەك, 21:05

قازاقستانعا كەلگەن رەسەيلىكتەردىڭ 65 پايىزى باسقا مەملەكەتتەرگە كەتكەن

استانا. قازاقپارات - سوڭعى اپتادا قازاقستانعا كەلگەن رەسەيلىكتەردىڭ زاڭ بۇزعانى تۋرالى مالىمەت تىركەلمەدى.

بۇل تۋرالى ماجىلىستە تىلشىلەر ساۋالىنا جاۋاپ بەرۋ كەزىندە ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ايتتى، دەپ حابارلايدى قازاقپارات ءتىلشىسى.

رەسەيدەن كەلىپ جاتقان ادامدار تۋرالى مالىمەتتەر كۇن سايىن وزگەرىپ جاتقانىنا توقتالعان ول: «شەكارا قىزمەتىندە ناقتى دەرەكتەر بار. 100 مىڭعا تارتا ادام كەلسە، بۇگىندە 65 پايىزعا جۋىعى ەلدەن شىقتى. كەشەگى دەرەك بويىنشا 64 مىڭنان استامى ەلىمىزدەن تىس اۋماققا كەتتى»، - دەدى.

سونىمەن قاتار تىلشىلەر جۇمىسسىز شەتەل ازاماتتارىنىڭ ارەكەتىنەن قىلمىستىڭ ارتۋى قاۋپىنە قاتىستى سۇراق قويدى.

«وسى اپتادا ەلگە كەلگەن ادامداردىڭ قىلمىس جاساۋ دەرەگى تىركەلمەدى. نەگىزىنەن زاڭ تالاپتارىنا باعىناتىن ادامدار كەلىپ جاتىر جانە ولاردىڭ وزدەرىندە قاراجاتى بار. ەگەر ولار قىلمىس جاساسا، وندا ءتيىستى شارالار قابىلدانادى. زاڭ بارىنە بىردەي ەكەنىن بىلەسىزدەر. كوشى-قون زاڭناماسىنىڭ تالاپتارىن ورىنداماسا، وندا ەل اۋماعىنان شىعارىلادى. ال قىلمىستىق ارەكەتتەرى ءۇشىن جاۋاپكەرشىلىككە تارتىلادى»، - دەدى م. قوجايەۆ.

ونىڭ ايتۋىنشا، ەلگە كەلىپ جاتقان شەتەل ازاماتتارىنا قاتىستى ءتيىستى تىركەۋ ءجۇرىپ جاتىر.


جاڭالىقتار