الماتىلىق 65 مىڭنان استام ازاماتقا بانك قىزمەتتەرىن پايدالانۋعا شەكتەۋ قويىلۋى مۇمكىن
65 مىڭنان استام الماتىلىق ءوز مىندەتتەمەلەرىن ءالى ورىنداعان جوق. بۇل تۋرالى الماتى قالاسى مەملەكەتتىك كىرىستەر دەپارتامەنتى وندىرىستىك ەمەس تولەمدەر باسقارماسىنىڭ باسشىسى قۋانىش تۇمەنبايەۆ ءمالىم ەتتى، دەپ حابارلايدى قازاقپارات ءتىلشىسى.
سپيكەردىڭ سوزىنشە، 1-قازان كۇنى جىلجىمايتىن مۇلىك جانە جەر ۋچاسكەلەرى مەنشىك يەلەرىنىڭ 2021 -جىلعا ەسەپتەلگەن مۇلىك سالىعىن تولەۋ مەرزىمى اياقتالادى. وعان ساناۋلى كۇن قالسا دا، 65215 مەنشىك يەسى سالىق مىندەتتەمەسىن ءالى ورىنداماعان.
«23-قىركۇيەكتەگى جاعداي بويىنشا 505 مىڭ ادامنىڭ 440 مىڭى 2021 -جىلعا جالپى سوماسى 2,9 ميلليارد تەڭگە مۇلىك سالىعىن تولەدى. 65 مىڭنان استام تۇرعىن جالپى سوماسى 945 ميلليون تەڭگە سالىقتى ءالى تولەگەن جوق»، - دەدى قۋانىش تۇمەنبايەۆ.
سونىمەن قاتار، ول بورىشكەرلەرگە قانداي شارا قولدانىلاتىنىن ايتتى.
«سالىق تولەۋ مەرزىمى وتكەننەن كەيىن، مۇلىك سالىعىن تولەمەگەندەر بانكتىك قىزمەتتەردى الا المايدى، ونىڭ ىشىندە بانكتىك شوت اشۋ، اۋدارىمدار جاساۋ، نەسيە الۋ جانە تاعى باسقا. بۇل سالىق كودەكسىندە قاراستىرىلعان. ءاربىر كەشىكتىرىلگەن كۇن ءۇشىن ۇلتتىق بانك بەلگىلەگەن رەسمي قايتا قارجىلاندىرۋ ستاۆكاسىنىڭ 1,25 ەسەلەنگەن مولشەرىندە ايىپپۇل سالىنادى»، - دەدى سپيكەر.